Samfélagsmiðlar

Þverrandi samstaða í röðum flugfreyja og flugþjóna

Ört stækkandi hópur innan Félags íslenskra flugfreyja ber ekki lengur traust til samninganefndar félagsins og vill að kosið verði um nýjan kjarasamning. Fólkið í hópnum er tilbúið í meiri vinnu fyrir sömu kjör og að eldri hvíldarákvæði falli niður.

icelandair radir

Nú eftir helgi ætla stjórnendur Icelandair að ljúka samningaviðræðum við kröfuhafa, Boeing flugvélaframleiðandann og íslensk stjórnvöld í tengslum við komandi hlutafjárútboð. Einnig var lagt upp með að langtíma kjarasamningar við flugvirkja, flugmenn og flugfreyjur yrðu frágegnir áður en fjárfestakynning verður gefin út í næstu viku.

Tveir fyrrnefndu hóparnir hafa samið en það hefur FFÍ, Flugfreyjufélag Íslands, ekki gert. Icelandair sagði upp nærri níu hundruð flugfreyjum og flugþjónum vegna þeirra áhrifa sem útbreiðsla kórónaveirunnar hefur haft á starfsemina. Aðeins 41 flugfreyja hélt starfi sínu en Icelandair, líkt og mörg önnur flugfélög, rær nú lífróður vegna heimsfaraldursins.

Innan raða Flugfreyjufélagsins ríkir vaxandi ólga með stöðu mála. „Fólk vill meiri upplýsingar og líka þær réttu. Staðan í samningaviðræðunum er þannig ávallt kynnt með neikvæðum formerkjum jafnvel þó við sjáum í tilboðunum að Icelandair hefur komið til móts við kröfur okkar að einhverju leyti. Við erum þó tilbúin til að falla frá hvíldarákvæðum og taka á okkur meiri vinnu fyrir sömu laun,“ segir viðmælandi Túrista.

Sá hefur unnið lengi sem flugverji hjá Icelandair og er fulltrúi hóps um þrjú hundruð félagsmanna í FFÍ sem vill að undirskrifaður kjarasamningur verði borin undir atkvæði sem fyrst.

Viðkomandi vill þó ekki koma fram undir nafni og vísar til þess að gagnrýni á samninganefnd Flugfreyjufélagsins sé jafnan illa tekið. „Þess vegna tjáir fólk sig bara í lokuðum hópum,” segir viðmælandi Túrista.

Einn helsti ásteitingarsteinninn í viðræðum FFÍ og Icelandair er hvíldarákvæði sem felur í sér að áhafnir félagsins mega í mesta lagi vinna fimmtíu blokktíma á fimmtán dögum. En blokktími er sá tími sem líður frá því flugvél fer frá flugstæði fyrir brottför og þar til hún er komin á flugstæði á áfangastað. 

Félag íslenskra atvinnuflugmanna gaf þetta hvíldarákvæði eftir í samningum við Icelandair sem undirritaðir voru í síðasta mánuði. Og fyrrnefndur hópur flugfreyja og flugþjóna vill slíkt hið sama. „Það er ekki forsvaranlegt að ríghalda í eldri hvíldarákvæði við þessar aðstæður sem uppi eru. Icelandair og önnur flugfélög eru í mjög þröngri stöðu vegna Covid-19,” segir viðmælandi Túristi.

„Samningarnir stranda helst á þessu ákvæði en segja má það barn síns tíma enda sett þegar almennar reglur um hámarks vinnutíma voru ekki eins strangar og þær eru í dag. Með því að fella þetta úr gildi þá verður t.d. hægt að fara fram á að flugfreyja fari í flug frá Kaupmannahöfn og svo beint áfram til austurstrandar Bandaríkjanna við komuna til Keflavíkurflugvallar. Þetta gera flugmenn í sumum tilfellum í dag og við ættum að geta það líka þó vissulega auki þetta álagið,” segir viðmælandi Túrista úr röðum flugfreyja.

Í yfirstandandi kjaraviðræðum er forsvarsfólk Icelandair einnig að fara fram á hækka lágmarks vinnuframlag félaga í FFÍ. Laun hækka aftur á móti ekki en þau yrðu leiðrétt afturvirkt árið 2023. Þessi krafa Icelandair felur í sér að núverandi launatrygging færist úr 65 blokktímum á mánuði í 70 hjá fastráðnum flugfreyjum og flugþjónum. Þau sem eru á tímabundnum samningi fara í 75 blokktíma og lausráðnir í 78 tíma. Áfram er hámarkið 85 tímar á mánuði en þó yfir allt árið. Í dag er það 10 tímum lægra yfir vetrarmánuðina.

„Þetta er í takt við vinnuframlag áhafna annarra flugfélaga. Það er því ekki rétt að farið sé fram á 100 blokktíma á mánuði eins og talað hefur verið um. Hámarkið er áfram 85 tímar,“ segir viðmælandi Túrista og fulltrúi þess hóps félagsmanna í FFÍ sem er ósáttur við störf samninganefndar félagsins í núverandi viðræðum við Icelandair.

Ekki náðist í formann FFÍ við vinnslu þessarar fréttar.

Nýtt efni

Eftirspurn eftir ferðalögum til útlanda meðal Íslendinga er áfram sterk fullyrti Bogi Nils Bogason, forstjóri Icelandair, á kynningu á nýju uppgjöri flugfélagsins nú í morgun. Farþegum Icelandair frá heimamarkaðnum fækkaði hins vegar um 9 prósent á öðrum ársfjórðungi í samanburði við sama tímabil í fyrra. Þennan samdrátt útskýrði Bogi Nils með því að benda á …

Í byrjun júlí tóku gildi bráðabirgðatollar á rafbíla sem fluttir eru inn frá Kína til aðildarríkja Evrópusambandsins. Var gripið til þessa eftir að rannsókn á vegum Framkvæmdastjórnar Evrópusambandsins leiddi í ljós að kínverska framleiðslan nyti óeðlilega mikils ríkisstuðnings og skaði því evrópskir rafbílaframleiðendur. Aukatollurinn, sem nú leggst ofan á þann 10 prósent toll sem fyrir …

Á öðrum ársfjórðungi í fyrra hagnaðist Icelandair um 2,1 milljarð króna fyrir skatt en núna var niðurstaðan hagnaður upp á 73 milljónir króna. Í dollurum, uppgjörsmynt Icelandair, var rekstrarafkoman (Ebit) jákvæð um 3,3 milljónir dollara en 21 milljón í fyrra. Sú niðurstaða var sú besta í mörg ár eins og sjá má. Skilyrði til flugrekstrar …

Fyrir fjórum vikum síðan boðaði Lilja Dögg Al­freðsdótt­ir, menn­ing­ar- og viðskiptaráðherra, átak í markaðssetningu á Íslandi sem áfangastað fyrir ferðamenn. Segja má að ráðherrann hafi verið að svara kalli forsvarsfólks ferðaþjónustunnar sem hvatt hefur til opinberrar kynningar á Íslandi sem áfangastað líkt og víða tíðkast. Tveimur dögum eftir að Lilja Dögg lofaði „hundruðum millj­óna“ til …

Stjórnendur Icelandair og Play gáfu það út í sumarbyrjun að fargjöld hefðu lækkað vegna mikillar samkeppni í flugi yfir Atlantshafið. Félögin tvö þurfa nú í auknum mæli að sækja á þann markað þar sem minni eftirspurn er eftir Íslandsferðum. Gallinn er hins vegar sá að farþegar sem fljúga milli Evrópu og N-Ameríku, með millilendingu á …

Í júní í fyrra voru óvenju margir bandarískir ferðamenn á landinu miðað við flugframboð. Nú í sumar hefur flugferðunum fjölgað um 12 prósent en samt fækkaði bandarískum ferðamönnum um 19 prósent í nýliðnum júní. Það er Icelandair sem er langumsvifamest í flugi héðan til Bandaríkjanna og stóð félagið undir 7 af hverjum 10 flugferðum héðan …

Víðast hvar eru gistinætur útlendinga helsti mælikvarðinn á gang mála í ferðaþjónustu enda nær eingöngu eyríki að telja ferðafólk við landamæri með einföldum hætti. Hjá frændþjóðum okkar eru gistinæturnar því aðalmálið og nú fjölgar erlendu gestunum í Noregi þónokkuð frá fyrra ári en forsvarsfólk íslenskra ferðaþjónustufyrirtækja hefur undanfarna mánuði bent á harðnandi samkeppni við þau …

helsinki yfir

Hagstofur víða birta nú nýjar verðlagsmælingar sem flestar sýna að verðbólga er á niðurleið. Nú í morgunsárið var komið að finnsku hagstofunni og þar sýna tölur að verðlag hefur hækkað um 1,3 prósent síðastliðna 12 mánuði. Á milli maí og júní fór verðbólgan niður um 0,2 prósent. Það voru lækkandi húsnæðisvextir og fallandi verð á …