Það má segja að stjórnendur Icelandair hafi teflt djarft í mars árið 2009 þegar félagið hóf með stuttum fyrirvara sölu á farmiðum til borgarinnar Seattle í norðvesturhluta Bandaríkjanna. Þegar þarna var komið við sögu var nefnilega skammt liðið frá efnahagshruninu mikla og áætlunarflug yfir á vesturströnd Bandaríkjanna er kostnaðarsöm útgerð.
Staða helstu eigenda Icelandair var líka það veik að ríkisbankarnir tveir, Íslandsbanki og Landsbankinn, tóku flugfélagið yfir skömmu eftir að farmiðasalan til Seattle hófst. Jómfrúarferðin var engu að síður farin nokkrum mánuðum síðar.
SAS gaf markaðinn eftir
Kveikjan að útrás Icelandair til Seattle liggur í sparnaðarprógrammi sem stjórnendur SAS kynntu í ársbyrjun 2009. Þar kom fram að ferðir félagsins vestur um haf yrðu skornar niður og bundinn yrði endi á áætlunarflugið til Seattle.
Þessi ákvörðun var mjög umdeild innan SAS samkvæmt samtali Túrista við einn af lykilstarfsmönnum flugfélagsins á þessum tíma. Ástæðan var sú að SAS hafði haldið úti fluginu til Seattle frá árinu 1966 og oftast með góðum árangri. Það er því ekki að furða að stjórnendur þess tala reglulega um að taka upp þráðinn í borginni.
Heimaborg stórfyrirtækja
Í þeim vangaveltum er ekki ósennilegt að horft sé til árangurs Icelandair sem hefur varla haft undan við að fjölga ferðunum til heimaborgar stórfyrirtækjanna Microsoft, Amazon, Starbucks og Boeing. Þangað flugu þotur félagsins allt að tvisvar á dag þegar mest lét en til samanburðar bauð SAS aldrei uppá fleiri ferðir en sex í viku. Reyndar nýtti það félag Boeing 747 og 767 breiðþotur í flugið á meðan Icelandair ferjar sína farþega á minni Boeing 757 þotum.
Það er heldur engin launung að flugleiðin til Seattle hefur verið ein sú arðbærasta í áætlun Icelandair síðastliðinn áratug. Og þar með ein helsta ástæða þess að félagið komst á flug á ný eftir fjárhagslega endurskipulagningu eftir hrun.
Hörð samkeppni síðustu ár
En þó SAS hafi ekki ennþá snúið aftur til Seattle þá hefur samkeppnin í Evrópuflugi þaðan harðnað og sérstaklega síðustu þrjú ár. Í takt við það þá hefur hlutdeild Icelandair sígið eins og sjá má hér fyrir neðan. Nú eru hún í fyrsta skipti komin niður fyrir tíund þegar horft er yfir tímabilið 2011 til 2019.
Þar vetur þungt að nú er hið írska Aer Lingus orðið hálfdrættingur á við Icelandair í Seattle. Farþegahópur þess félags stækkaði um nærri sjötíu prósent í fyrra en farþegum Icelandair fækkaði um fjóra af hundraði. Tölur sem Túristi hefur frá bandarískum flugmálayfirvöldum sína svo að sætanýtingin í flugi Icelandair til Seattle versnaði töluvert í byrjun þessa árs.
Miklu fleiri á ferðinni til Evrópu
Markaðurinn hefur þó stækkað hratt því í fyrra nýttu nærri í 1,6 milljón farþega sér Evrópuflug til og frá Seattle eða tvöfalt fleiri en árið 2011.
Túristi hefur ekki því miður ekki farþegatölur fyrir árin 2009 og 2010 en eins og ítrekað hefur komið fram hér á síðunni þá eru svona upplýsingar leyndarmál hjá íslenskum flugmálayfirvöldum á meðan flest önnur lönd líta á þau sem opinber gögn.
