Þegar mest lét átti bandaríski vogunarsjóðurinn PAR Capital Management 745 milljónir hluta í Icelandair Group. Bróðurpartinn af þessari eign keypti sjóðurinn í byrjun apríl í fyrra á 5,6 milljarða króna og bætti svo við bréfum mánuðina á eftir og varð stærsti hluthafinn í Icelandair.
Allt frá því í vor hefur PAR Capital hins vegar selt bréf í Icelandair í smáskömmtun og hefur eign sjóðsins þá dregist saman um nokkrar milljónir hluta í viku hverri.
Vogunarsjóðurinn tók ekki þátt í hlutafjárútboðinu í síðasta mánuði og á í dag rétt um 544 milljónir hluta í Icelandair Group samkvæmt nýjasta listanum yfir stærstu hluthafa samsteypunnar. Undir lok vikunnar ætti uppfært yfirlit að birtast á heimasíðu Icelandair og þá kemur í ljós hvort fjöldi bréfa í eigu PAR Capital hefur dregist enn frekar saman.
Gengi hlutabréfa í Icelandair hefur lækkað töluvert frá útboðinu fyrir þremum vikum síðan. Útboðsgengið var ein króna á hlut en er núna 87 aurar. Lækkunin nemur 13 prósentum.
Það eru ekki mörg önnur flugfélög sem hafa efnt til hlutafjárútboðs í kórónuveirukreppunni. Það gerði þó Finnair í lok júní og var útboðsgengið 0,4 evrur á hlut. Til samanburðar var geng hlutabréfa í Finnair 1,1 evra í ársbyrjun en þá var hver hlutur í Icelandair metinn á 7,8 krónur.
Töluverð umframeftirspurn var eftir nýju hlutbréfunum í Finnair líkt og einnig varð raunin hjá Icelandair. Eftir útboðið í Finnlandi hækkaði gengi Finnair um ríflega helming. Það hefur svo lækkað á ný og er núna 0,39 evrur á hlut eða 2,5 prósentum undir útboðsgengi.
Þess má geta að finnska ríkið á rúmlega helming í Finnair og hélt þeim hlut í útboðinu.
