Þotur Icelandair munu eingöngu fljúga til Amsterdam, Boston, Kaupmannahafnar og London fram til lok næsta mánaðar samkvæmt flugáætlun félagsins. Sú tók gildi á mánudaginn en hefur nú þegar riðlast því allar brottfarir til bresku höfuðborgarinnar í þessari viku hafa fallið niður. Einnig ferðin til Kaupmannahafnar á miðvikudag.
Það að stór hluti ferða Icelandair falli niður nú í haust er engin nýlunda líkt og Túristi fjallaði um fyrr í þessum mánuði. Þá gerði flugáætlun félagsins aftur á móti ráð fyrir miklu fleiri ferðum en nú er. Þannig voru sextíu og níu brottfarir á áætlun félagsins í þarsíðustu viku en þær hefðu átt að verða átján í þessari viku. Helmingi þeirra hefur verið aflýst.
Það vekur líka athygli að Icelandair er með opið fyrir bókanir í flugferðir næstu daga sem eru ekki einnu sinni á hinni nýju flugáætlun. Þannig er hægt bóka miða til Parísar, Berlínar, Stokkhólms og Óslóar næstu daga jafnvel þó þotur Icelandair hafi ekki sést í þessum borgum svo vikum skiptir.
Það er því ekki hlaupið að því að bóka flug með Icelandair þessa dagana og að sögn Brynhildar Pétursdóttur, framkvæmdastjóra Neytendasamtakanna, þá hafa margar kvartanir borist þangað vegna þessa. „Ekki síst vegna þess að fólk getur ekki planað ferðir, vitandi að það eru meiri líkur en minni að ferðin verði aldrei farin.“
Neytendastamtökin birtu í gær frétt á heimasíðu sinni þar sem bent er á rétt farþega Icelandair á skaðabótum ef flugi er aflýst með stuttum fyrirvara. Samgöngustofa úrskurðaði til að mynda í vikunni að Icelandair ætti að greiða tveimur farþegum félagsins 400 evrur á mann vegna niðurfellingar á flugi.
Icelandair er vissulega ekki eina flugfélögin sem gerir breytingar á flugáætlun sinni vegna ástandsins sem nú ríkir. Aðdragandi breytinga er þó í mörgum tilfellum mun lengri en hjá Icelandair. Það sést til að mynda á því hve mörg erlend flugfélög hafa nú þegar tekið út áætlunarflug til Íslands næstu vikur.
