V-one er nýtt íslenskt fyrirtæki sem sérhæfir sig í þjálfun og ráðgjöf fyrir flugmenn og flugfélög á alþjóðavísu. Fyrirtækið var stofnað af teymi þjálfunarflugstjóra Icelandair sem allir eiga það sameiginlegt að búa yfir víðtækri reynslu í starfi.
Hörður Þorvaldsson er einn þeirra og í samtali við Túrista segir hann markmiðið vera að nýta þá umgjörð, starfskrafta og þekkingu sem skapast hafi á Íslandi með kraftmiklum flugrekstri síðustu áratugi.
„V-one hefur þegar tekið að sér þjálfun fyrir erlend flugfélög sem býr til ný og gjaldeyrisskapandi störf og tekjur fyrir ferðaþjónustuna,“ bætir Hörður við.
Starfsemi V-one fer að hluta til fram í TRU Flight Training við Flugvelli í Hafnarfirði en þar er að finna flugherma fyrir Boeing 757, 767 og 737 MAX þotur. Icelandair er meirihluta eigandi í þjálfunarsetrinu.
„Með tilkomu V-one er flugmönnum sem misst hafa vinnuna hjá íslenskum flugfélögum á undanförnum mánuðum nú gert kleift að viðhalda starfsréttindum sínum og uppfylla kröfur um árlega endurþjálfun. Með því verða þeir samkeppnishæfir þegar flugiðnaðurinn tekur við sér á ný,“ segir Hörður.
Allri þjálfun flugmanna hjá Icelandair hefur hingað til verið sinnt innanhús að sögn Harðar. Aðspurður hvort nú verði breyting þar á segist hann ekki vita hvernig þessum málum verði háttað í framtíðinni hjá flugfélaginu. Stærsti hluti flugmannahópsins, sem sá um þjálfanir hjá Icelandair, er hins vegar núna í uppsögn.
Hörður ítrekar að V-one markaðssetur sig á erlendum markaði.
