Hið verðandi flugfélag Play hefur fengið lendingarleyfi á tveimur flugvöllum í London og einnig í Dublin. Þetta kom fram í frétt Mbl.is í dag. Írska borgin var ekki einn þeirra áfangastaða sem félagið setti upphaflega stefnuna á þegar hulunni var svipt af áformum félagsins fyrir ári síðan.
Play getur aðeins haldið þessum lendingarleyfum til 31. janúar nk. nema vera komið með flugrekstrarleyfi fyrir þann tíma. Og til að fá flugrekstrarleyfi verður Play að hafa fest sér sína fyrstu þotu fyrir þennan tíma.
Heimildir Túrista herma einnig að Play hafi sótt um lendingarleyfi, eða svokölluð slott, í átta Evrópulöndum og líka í Bandaríkjunum og Kanada. Í öllum tilvikum sækir félagið til sömu borga og eru hluti af leiðakerfi Icelandair í dag.
„Við höfum sótt um slott á völlum víðsvegar um Evrópu og Norður-Ameríku. Það er rétt. Teljum það klárlega vera raunhæft að fljúga til Bandaríkjanna þegar lausn er komin á Covid faraldurinn,“ segir Arnar Már Magnússon, forstjóri Play, í svari til Túrista.
Hann bætir því við að Norður-Ameríka sé hluti af viðskiptamódeli Play og því fyrr sem félagið geti hafið flug þangað þeim mun betra. Arnar Már ítrekar að horft sé til þess að hefja fyrst flug til Bandaríkjanna þegar heimsfaraldurinn er yfirstaðinn.
Arnar Már segir að Play sé núna að klára lokastig umsóknar sinnar um flugrekstrarleyfi og af þeim sökum hafi verð sótt um þessi lendingarleyfi.
Aðspurður um hvenær dagsins þotur Play muni fljúga til og frá landinu þá segir Arnar Már að um sé að ræða tíma sem henti vel fyrir rekstur Play. Sérstaklega þegar kemur að flugi vestur um haf. Um sé að ræða svipaða tíma og WOW air hafði en þó ekki alveg þá sömu.
