Samfélagsmiðlar

Segir kæfandi að eiga í samkeppni við ferðaskrifstofu sem er í eigu stærsta flugfélagsins

Icelandair Group hefur sett ferðaskrifstofuna Iceland Travel á sölu. Áfram ætlar flugfélagið þó halda eftir ferðaskrifstofunni Vita.

Þórunn Reynisdóttir er forstjóri Ferðaskrifstofu Íslands sem rekur m.a. Úrval-Útsýn.

„Við erum líklega einn stærsti viðskiptavinur Icelandair en viðskiptasambandið er mjög sérstakt að því leyti að forstjóri Icelandair og tveir af framkvæmdastjórum flugfélagsins skipa stjórn Vita, okkar helsta samkeppnisaðila. Hagsmunatengslin gætu ekki verið meiri,“ segir Þórunn Reynisdóttir, forstjóri Úrval-Útsýn.

Henni þykir það merkilegt að stjórnendur Icelandair Group skilgreini ferðaskrifstofuna Vita sem hluta af flugstarfsemi fyrirtækisins eins og fram kom hér á Túrista í gær. Vita verður þar með ekki seld út úr Icelandair samstæðunni en söluferli á ferðaskrifstofunni Iceland Travel er að hefjast.

„Vita er ferðaskrifstofa en ekki flugfélag samkvæmt opinberri skráningu,“ bendir Þórunn á.

Hún segist jafnframt viss um að Icelandair myndi aldrei komast upp með það erlendis í dag að reka eigin ferðaskrifstofur í samkeppni við þarlenda aðila.

„Ég er sannfærð um að ef stjórnendur Icelandair myndu fylgja sömu línu hér á landi og þeir gera út í heimi þá hefði íslenski ferðaskrifstofumarkaðurinn fært þeim mun meiri viðskipti en raunin hefur verið. Það er nefnilega kæfandi að þurfa að eiga í samkeppni við ferðaskrifstofu sem eru í eigu þess flugfélags sem er með stóran hluta af öllum samgöngum til og frá landinu,“ bætir Þórunn við.

Og það eru fleiri sem hefðu viljað sjá draga úr umsvifum Icelandair á ferðaskrifstofumarkaði. Í viðtali við Túrista í gær sagði Sævar Skaptason, framkvæmdastjóri Bændaferða og Hey Iceland, að hann hefði viljað að Icelandair seldi einnig Vita. Vísaði hann meðal annars til þess að tengsl Iceland Travel við Icelandair hefðu líklega skekkt samkeppnisstöðuna á markaðnum.

Þórunn ítrekar að umsvif Icelandair í ferðaskrifstofurekstri takmarkast ekki bara við Vita og Iceland Travel því flugfélagið er einnig með eigin ferðaskrifstofu innanhús sem setur saman pakkaferðir.

„Þessi innanhúsferðaskrifstofa er svo sennilega ein sú stærsta á landinu þó það fáist ekki uppgefið hversu mikil veltan í þessari hliðardeild er,“ segir forstjóri Úrval-Útsýn að lokum.

Nýtt efni

Það er bannað að auglýsa vín á Íslandi - nema auðvitað í amerískum samfélagsmiðlum og þeim erlendu vefsíðum sem íslenskir lesendur heimsækja. Áfengisauglýsingar eru hinsvegar mikilvæg tekjulind fjölmiðla í löndum allt í kringum okkur enda býr áfengisiðnaðurinn yfir miklu fjármagni og vill viðhalda áhuga neytenda á öllum aldri á þessum viðurkennda en varasama vímugjafa. FF7 …

Með hjálp málgreiningarforrits og athugun á orðanotkun hefur Lapo Lappin komist að því að tvær af vinsælustu bókum Camillu geta varla verið skrifaðar af höfundinum sjálfum og bendir Lappin á að textinn líkist mjög textum eftir annan rithöfund, Pascal Engman. Sjálf neitar Camilla (og það gerir Pascal einnig) öllum ásökunum og telur þær vera ávöxt öfundar …

Stundum fer rás atburða í hring. Flugvélasmiðja Spirit í Wichita var sett á stofn af Stearman Aircraft árið 1927 en tveimur árum síðar eignaðist United Aircraft and Transport Corporation fyrirtækið og rak til ársins 1934. Þá tók Boeing við rekstrinum og í heimsstyrjöldinni síðari, árið 1941, varð Spirit deild innan Boeing. Þannig hélst fyrirkomulagið til …

„Ég er búinn að vera í björgunarsveit í að verða 15 ár og í öllum útköllum tók ég Beef Jerky, þurrkað nautakjöt frá Bandaríkjunum, með mér sem nesti í neyð. Ég gekk til dæmis einu sinni þvert yfir landið, frá Reykjanestá yfir á Langanes og fyrir þá ferð gerði ég mikla leit að góðu, íslensku …

Næring forfeðra okkar á oftar en ekki fyllilega erindi við nútímamanninn. Sum þeirra matvæla sem nú er hent var hreinlega slegist um áður fyrr. Með vaxandi hraða þjóðfélagsins og breyttri menningu hefur heilsusamlegt hráefni eins og innmatur, dýrafitur, bein og mergur orðið að hliðarafurð sem fer til spillis. Þessi sóun hefur í för með sér …

Gistinætur Breta á norðlenskum hótelum í janúar voru 422 talsins sem er rétt um tíund af því sem var í janúar árin 2018 og 2019 þegar breska ferðaskrifstofan Super Break bauð upp á pakkaferðir til Akureyrar frá nokkrum breskum flugvöllum. Tilkoma áætlunarflugs Easyjet frá London til Akureyrar hefur því ennþá miklu minni áhrif á gistigeirann …

Stærstu hluthafar Play skuldbindu sig til að leggja flugfélaginu til 2,6 milljarða króna í nýtt hlutafé í byrjun síðustu viku en með þeim skilyrðum að hlutafjárútboðið myndi nema samtals fjórum milljörðum króna. Nú hefur félagið tryggt sér þá 1,4 milljarða sem upp á vantaði. Þetta kemur fram í tilkynningu. Þar segir að þessi hlutafjáraukning sé …

Í febrúar léku þýsku fótboltaliðin Hansa Rostock og Hamburger Sport Verein (HSV) á heimavelli Hansa í Rostock. Bæði liðin eru gömul stórveldi á fótboltavellinum en eru nú í nokkrum öldudal og leika í annarri deild þýska fótboltans. Leikurinn endaði 2-2 sem voru auðvitað töluverð vonbrigði fyrir lið Hamborgar því þeir keppast við að komast aftur …