Skeljungur seldi í lok síðustu viku allan hlut sinn í Icelandair Group og einnig þá kauprétti sem fylgdu hlutabréfakaupunum í útboði flugfélagsins síðastliðið haust.
Upplýst var um þessi viðskipti vegna þess að Birna Ósk Einarsdóttir, framkvæmdastjóri sölu- og þjónustusviðs Icelandair Group, er varaformaður stjórnar Skeljungs.
Spurð af hvaða fyrirtækjum Icelandair Group kaupir eldsneyti á þotur sínar og flugvélar þá segir Ásdís Pétursdóttir, upplýsingafulltrúi flugfélagsins, að samningur sé í gildi við Air BP á Keflavíkurflugvelli, Skeljung á Reykjavíkurflugvelli og ýmis alþjóðleg olíufélög í útlöndum.
Ásdís tekur fram að við eldsneytiskaup þá fylgi Icelandair faglegu ferli þar sem viðskiptin eru boðin út á alþjóðamarkaði.
Birna Ósk er ekki eini framkvæmdastjóri Icelandair sem á sæti í stjórn orkufyrirtækis. Það gerir líka Tómas Ingason, framkvæmdastjóri upplýsingatæknisviðs, sem hefur frá því í vor setið í stjórn Orku náttúrunnar.
Og fleiri framkvæmdastjórar Icelandair Group sitja í stjórnum annarra fyrirtækja samkvæmt upplýsingum frá flugfélaginu.