Strangar ferðatakmarkanir gilda áfram víða um heim og nú þurfa farþegar sem koma til Bretlands og Danmerkur að sýna fram á neikvæða niðurstöðu í nýju Covid-19 prófi. Og ennþá fá erlendir ferðamenn ekki að komast inn fyrir landamæri Bandaríkjanna og Kanada.
Af þessum sökum halda stjórnendur flugfélaga áfram að skera niður flugáætlanir sínar og þannig gerir uppfærð áætlun Icelandair aðeins ráð fyrir flugi til sex evrópskra borga í febrúar. Áður var áformað að taka upp þráðinn í flugi til Norður-Ameríku um miðjan næsta mánuð.
Í febrúar munu þotur félagsins fljúga daglega til Kaupmannahafnar og tvisvar í viku til London, Amsterdam og Boston. Auk þess verða vikulegar ferðir til Munchen og tvær til Frankfurt.
Að jafnaði mun Icelandair þá standa fyrir um tveimur brottförum á dag frá Keflavíkurflugvelli þessa tvo fyrstu mánuði ársins. Á sama tíma í fyrra og hittifyrra voru brottfarirnar um tuttugu og fimm á dag.
Og miðað við þessa nýju flugáætlun Icelandair þá verður framboðið í janúar og febrúar, í sætiskílómetrum talið, á bilinu 55 til 58 milljónir í hvorum mánuði fyrir sig samkvæmt útreikningum Túrista.
Til samanburðar gerði spá félagsins, sem birt var í tengslum við hlutafjárútboðið haust, ráð fyrir að framboðið yrði að jafnaði 77 milljónir sætiskílómetra á mánuði á fyrsta fjórðungi þessa árs. Samdrátturinn verður þá 94 prósent í stað 92 prósenta.
