Farþegum í Íslandsflugi frá Bretlandi fækkaði mest í Glasgow í fyrra enda hafa þotur Icelandair lítið flogið til skosku borgarinnar í heimsfaraldrinum. Þar nam samdrátturinn 85 prósentum.
Í heildina fækkaði farþegum í flugi milli Íslands og Bretlands hins vegar um 73 prósent. Þeir voru hátt í 1,3 milljónir árið 2019 en rétt um 340 þúsund í fyrra samkvæmt tölum frá breskum flugmálayfirvöldum.
Minnstur var samdrátturinn í Bristol eða þriðjungur. Skýringin á því er sú að easyJet heldur vanalega aðeins úti áætlunarflugi frá Bristol til Íslands yfir vetrarmánuðina. Þar með náði breska flugfélagið að klára stóran hluta af áætluninni áður en heimsfaraldurinn setti allt úr skorðum í byrjun mars í fyrra.
Eins og sjá má á töflunni þá er Heathrow áfram sá breski flugvöllur sem flestir nýta til að komast til og frá Íslandi. Fyrir fall Wow Air var það hins vegar Gatwick sem var í efsta sæti því þegar best lét nýttu fjögur flugfélög þann flugvöll fyrir áætlunarflug til Íslands.
Þess má geta að upplýsingar eins og fram koma í þessari grein eru ekki opinberar hér á landi. Tilraunir Túrista til að fá þær upp á borðið hafa engu skilað.
