Síðastliðið sumar samþykkti Alþingi lög sem gefa ferðaþjónustufyrirtækjum heimild til að fara í greiðsluskjól vegna þeirra erfiðleika sem kórónuveirukreppan hefur valdið. Allrahanda GL ehf., rekstraraðili Gray Line á Íslandi, er eitt þeirra fyrirtækja sem nýtti þetta nýja úrræði um heimild til fjárhagslegrar endurskipulagningar og að sögn Þóris Garðarssonar, stjórnarformanns, þá er sú vinna á áætlun.
Verkefnið felur meðal annars í sér að skipta upp rekstri fyrirtækisins og verður ferðaskrifstofustarfsemin færð yfir í annað félag, GL Iceland ehf. Hópferðabílareksturinn og rekstur fasteignarinnar að Klettagörðum 4 verður áfram í Allrahanda GL ehf. útskýrir Þórir.
Hann segir þetta sama fyrirkomulag og margir af samkeppnisaðilum fyrirtækisins starfa samkvæmt.
„Það var í raun orðið löngu tímabært að skipta starfseminni upp því rekstur ferðaskrifstofu og hópbifreiðafyrirtækis er mjög ólíkur,“ bætir Þórir við.
Til viðbótar við þessar breytingar á hefur Allrahand GL gengið frá samkomulagi um að leigja helming af húsnæði fyrirtækisins undir þjónustuverkstæði fyrir Mercedes Benz. En bílaumboðið Askja og Sleggjan hafi gengið til samstarfs um þjónustu við vöru- og hópferðabíla frá Mercedes-Benz, Setra og Unimog.
„Þessi samningur felur það jafnframt í sér að leigutaki tekur að sér viðhald og þjónustu á bílaflota Gray Line. Það tryggir okkur áfram áfram fyrsta flokks viðhald, gæði og öryggi fyrir viðskiptavinina auk þess sem við náum fram þeirri fjárhagslegri hagræðingu sem er eitt af meginmarkmiðum þess verkefnis sem við erum í,“ segir Þórir að lokum.
