Erlend flugfélög hafa í heildina fækkað áætlunarferðum sínum til Íslands nú í júní um fjórðung frá því sem lagt var upp með fyrir fjórum vikum síðan.
Sum þessara félaga hafa jafnvel tekið úr sölu allt Íslandsflug fyrir komandi vertíð og eitt þeirra er hið finnska Finnair. Í svari til Túrista staðfestir talsmaður félagsins að áætlunarflug til Keflavíkurflugvallar verði ekki á dagskrá nú í sumar og segir að ekki liggi fyrir hvernig vetraráætlunin verði.
Finnska félagið hafði áður ráðgert að hefja flug til Íslands nú í byrjun mánaðar eins og Túristi greindi frá. Þau áform ganga þó ekki eftir.
Fyrir kórónuveirufaraldurinn bauð Finnair upp á daglegar ferðir til Íslands frá Helsinki allt árið um kring. Og um borð var fjöldi ferðamanna frá Asíu enda nær leiðakerfi Finnair til fjölda margra borga í Austurlöndum fjær.
Ennþá liggur hins vegar ekki fyrir hvenær ferðalög verða með eðlilegri hætti á ný milli Evrópu og Asíu. Og sú óvissa setur skiljanlega strik í reikninginn hjá Finnair og útgerð félagsins á Keflavíkurflugvelli.
Icelandair gerir ráð fyrir að taka upp þráðinn í flugi sínu til Helsinki síðar í þessum mánuði.
