Greiðsluskjóli ferðaþjónustufyrirtækisins Allrahanda Gray Line lauk í lok júní og þá lögðu forsvarsmenn fyrirtækisins fram frumvarp að nauðasamningi. Nokkrir kröfuhafar mótmæltu þegar málið var tekið fyrir í héraðsdómi þann 8. júlí og gaf dómari þeim frest fram í miðjan ágúst til að skila greinargerðum máli sínu til stuðnings.
Í bréfi sem meirihlutaeigendur Allrahanda Gray Line, þeir Þórir Garðarsson og Sigurdór Sigurðsson, sendu kröfuhöfum í gær leggja þeir mat á afstöðu þessara kröfuhafa til neyðasamninganna.
„Átta þeirra tengjast Kynnisferðum og Hópbílum, helstu keppinautum Allrahanda GL. Sjálfsagt þykir þeim fyrirtækjunum einhvers virði að tapa kröfum til að losna við keppinaut. Ríkisfyrirtækið Isavia mótmælti einnig samþykkt nauðasamningsins. Þau mótmæli verður að skoða í ljósi þess að Allrahanda GL hefur staðið í harðri baráttu og málaferlum við Isavia vegna meintra brota á lögum um opinber útboð og um sanngjarna gjaldtöku fyrir aðstöðu á fjarstæðum á Keflavíkurflugvelli. Ríkisfyrirtækinu virðist, líkt og keppinautunum, einhverjum milljónum fórnandi til að losna við óþægindin,“ segir í bréfinu til kröfuhafa.
Neikvæð afstaða Landsbankans, lánveitanda Allrahanda GL og viðskiptabanka, til neyðarsamninganna kemur þeim Þóri og Sigurdóri ekki á óvart þar sem bankinn hafi viljað að fyrirtækið seldi fasteign sína að Klettagörðum 4 sem fyrst.
Annar stór kröfuhafi, N1, mótmælti einnig nauðasamningnum fyrir héraðsdómi,
„Af einhverjum ástæðum, sem N1 hefur ekki tilgreint sérstaklega, þá hefur fyrirtækið sótt það stíft að fá Allrahanda GL úrskurðað gjaldþrota. Fyrst mótmælti N1 því fyrir héraðsdómi að greiðsluskjól Allrahanda GL yrði framlengt í fyrsta skiptið. Héraðsdómur féllst ekki á þá kröfu og þá áfrýjaði N1 til Landsréttar. Málsástæðan sem N1 tilgreindi var að Allrahanda GL hafi ekki verið gjaldfært áður en heimsfaraldurinn setti ferðaþjónustuna á hliðina. Landsréttur féllst ekki á það og dæmdi Allrahanda GL í vil. Niðurstaða Landsréttar var afar skýr, að Allrahanda GL hafi verið á mjög svo jákvæðri siglingu fyrir heimsfaraldurinn og greiðsluskjól væri rétta úrræðið til að hjálpa fyrirtækinu yfir hjallann,“ segja þeir Þórir og Sigurdór.
Þeir bæta við að þrátt fyrir að málaferlin við N1 hafi verið kostnaðarsöm þá hafi þau verið gagnleg því þau hafi tekið af allan vafa um að Allrahanda GL hafi verið lífvænlegt fyrirtæki áður en heimsfaraldurinn skall á.
Í bréfinu til kröfuhafa Allrahanda Gray Line kemur líka fram það mat Þóris og Sigurdórs að ef héraðsdómur samþykkir ekki nauðasamninginn þá séu litlar líkur á heimtum fyrir almenna óveðtryggða kröfuhafa. Þar með fari Allrahanda Gray Line mögulega í þrot.