Það verða sæti fyrir rétt um þrjátíu þúsund farþega í ferðum Play í september.
Það er fækkun um átta þúsund sæti frá því nú í ágúst en stjórnendur flugfélagsins hafa skorið niður flugáætlunina töluvert á fyrri helmingi næsta mánaðar líkt og Túristi greindi frá í síðustu viku.
Á því tímabili hefur ferðunum til Berlínar, London og Parísar verið fækkað úr fjórum í viku niður í tvær. Þrátt fyrir þriðja þotan hafi bæst í flota félagsins nú í byrjun mánaðar.
Seinni hlutann í september er ennþá gert ráð fyrir hefðbundinni áætlun og það á líka við um október. Þar af leiðandi eykst framboðið á ný í október og verður það sama og nú í ágúst eins og sjá má á grafinu hér fyrir neðan.
Að jafnaði mun Play þá geta flogið með rúmlega tólf hundruð farþega á degi hverjum en áform félagsins gera ráð fyrir að sætanýtingin verði 72 prósent í ár.
Hafa ber í huga að sætanýting flugfélaga er reiknuð út frá fjölda sætiskílómetra. Þess vegna vega lengri leiðir þyngra en þær styttri.
