Sautján áætlunarferðum til Tenerife hefur verið bætt við flugáætlun Icelandair næstu mánuði líkt og Túristi greindi frá í gær. Vita, sem er í eigu Icelandair Group, hefur þessu til viðbótar fjölgað vikulegum brottförum til Alicante nú í ágúst úr tveimur í þrjár.
„Bókanir hafa verið sterkar bæði hvað varðar beina sölu flugmiða og í pakkaferðum og það hefur kallað á meira framboð,“ segir Guðni Sigurðsson, upplýsingafulltrúi Icelandair, spurður um skýringu á þessari viðbót.
Þórunn Reynisdóttir, forstjóri Úrval-Útsýn, segir ekki ætlunina að bæta við ferðum til Spánar þar á bæ. Hún telur það líka víst vera að aukin eftirspurn eftir Spánarflugi Icelandair og Vita skrifist á notkun vildarpunkta flugfélagsins.
Máli sínu til stuðnings bendir hún á að nú sé hægt að greiða margfalt meira af verði pakkaferða Vita með vildarpunktum Icelandair en áður. Hámarkið hafi lengstum verið við tíu þúsund krónur en núna er það sexfalt hærra.
„Það er galið að Icelandair niðurgreiði pakkaferðir einnar ferðaskrifstofu með þessum hætti. Vissulega er Vita í eigu Icelandair Group en þetta skekkir samkeppnisstöðuna á markaðnum verulega eins og sést í þeirri staðreynd að eingöngu Icelandair og Vita fjölga ferðum til Tenerife og Alicante. Ég þekki ekki til neins annars flugfélags sem býður viðskiptavinum að nota vildapunktana sína til kaupa á pakkaferð hjá ferðaskrifstofu,“ útskýrir Þórunn.
Viðbótar brottfarir til Tenerife eru heldur ekki á teikniborðinu hjá Play að sögn Birgis Jónssonar, forstjóra flugfélagsins. Í því sambandi bendir hann á að leigugreiðslur Play á flugvélum miðist aðeins við flogna tíma. Þar með sé ekki mikil pressa að bæta við flugum nema eftirspurnin kalli eftir því.
Birgir bætir því við að Las Palmas á Kanarí hafi verið bætt við vetraráætlun Play nýverið og nú sé lögð áhersla á að selja sætin þangað áður en lengra er haldið.
