Stjórnendur Play hafa dregið úr áformum um flug til Parísar, Berlínar og London í næsta mánuði. Í flugi til allra þessara borga er Play í samkeppni við önnur flugfélög.
Það á reyndar við um allar aðra áfangastaði í leiðakerfi Play. Félagið hefur nefnilega ekki sótt á inn á markaði sem enginn annar sinnir ef Salzburg er frátalin. Icelandair bætti svo þeirri borg við vetraráætlun sína í vikunni
En sem fyrr segir þá stendur fyrir dyrum niðurskurður á flugi Play til höfuðborga Frakklands, Þýskalands og Bretlands.
Engu að síður er staðan sú að farþegar á leið til þessara þriggja borga, næstu tvær vikur, fá í öllum tilvikum ódýrustu miðana hjá Play. Og verðmunurinn er umtalsverður.
Þannig er meðalfargjaldið hjá British Airways frá Íslandi til London fimmfalt hærra en hjá Play. Munurinn á Icelandair og Play er tvöfaldur eins og sjá má á grafinu hér fyrir neðan.
Skýringarnar á því að Play selur ekki nægjanlega mörg sæti, þrátt fyrir að vera með ódýrustu fargjöldin, geta verið margar. Hin flugfélögin eiga sér til að mynda langa sögu á meðan Play er óþekkt stærð í útlöndum. Einnig eru ferðir Icelandair mun tíðari og farþega félagsins hafa því úr fleiri ferðum að velja.
Í þessari könnun Túrista var aðeins horft til fargjalda á leiðinni frá Keflavíkurflugvelli dagana 23. ágúst til 5. september. Heimferðin var ekki tekin með í reikninginn en í öllum tilvikum er um að ræða farmiða án innritaðs farangurs.
Túristi kannaði einnig fargjöldin til Kaupmannahafnar og niðurstaðan var sú sama, Play er um helmingi ódýrari en Icelandair en þó með mun færri ferðir.
Meðalverð á ódýrustu farmiðunum frá Keflavíkurflugvelli dagana 23.ágúst til 5. september.
