Óseldu sætunum í þotum Play fækkaði umtalsvert í október frá því sem var mánuðina á undan. Sú bæting skrifast að miklu leyti á Spánarflugið því þar var sætanýtingin miklu betri en í flugi til annarra áfangastaða samkvæmt samantekt Túrista.
Nú í nóvember er framboð á flugi til Spánar hins vegar minna en verið hefur því engar ferðir eru á dagskrá til Alicante og Barcelona. Birgir Jónsson, forstjóri Play, segir að þar með verði félagið hugsanlega af tekjum en á móti komi lægri kostnaður.
„Það er erfitt að lesa markaðinn þegar hann breytist svona hratt og fylgir ekki sögulegum sveiflum. Við vorum því með vaðið fyrir neðan okkur þegar við skipulögðum haustið og nýttum okkur þann sveigjanleika sem leigusamningar á þotunum veita. Mögulega hefðum við getað keyrt á Spán í nóvember, þó að sögulega sé það tæpt. Við vildum vera varkár og taka ekki áhættuna og skiljum mögulega eftir tekjur nú þegar eftirspurnin er góð en spörum líka kostnað. Þetta þarf að vera í jafnvægi. Það er líka öðruvísi samsetning áfangastaða í nóvember, meiri fókus á borgarferðir en sólarferðir en var í október. Það breytist aftur í desember þegar sólarferðirnar koma inn. Framboðið sveiflast einnig nokkuð á milli þessara mánaða og þar með rekstrarkostnaðurinn sem skiptir líka miklu máli í þessu,“ útskýrir Birgir.
Spurður hvort ekki stefni í lægri sætanýtingu hjá flugfélaginu nú í nóvember vegna færri ferða til Spánar þá segist hann ekki geta komið með neinar yfirlýsingar um nýtinguna í nóvember fyrr hún verði gefin út formlega í tilkynningu til Kauphallarinnar.
„Við höfum þó sagt að útlitið sé gott og að það stefni í góða nýtingu á næstu mánuðum, svona miðað við ástand á markaðinum. Við fylgjumst til dæmis með áhrifum af aukningu í smitum en enn sem komið er erum við ekki að sjá sömu hegðun og í sumar þegar fólk breytti [ferðaplönum] í miklum mæli. Það er meiri yfirvegun í gangi enn sem komið er.“
Líkt og Túristi greindi frá í gær þá flutti Play fleiri farþega til Alicante nú í október en systurfélögin Icelandair og Vita. Það hefur ekki gerst áður en sætanýtingin í flugi félagsins til spænsku borgarinnar var 85 prósent samkvæmt útreikningum sem byggja á tölum frá spænskum flugmálayfirvöldum.
Play náði ennþá betri árangri í flugi sínu til Tenerife því þar voru ríflega níu af hverjum tíu sætum skipuð farþegum eins sjá má á grafinu hér fyrir neðan. Ferðunum til spænsku eyjunnar verður haldið áfram í allan vetur.
Fyrir jólin hefst svo flug til Alicante á nýjan leik og jómfrúarferð Play til Las Palmas á Kanarí verður farin 22. desember. Áætlunarflugið til Barcelona bíður hins vegar fram að páskum.
