Icelandair hefur um langt árabil boðið upp á tíðar ferðir til Amsterdam og í næstu viku er jómfrúarferð Play til höfuðborgar Hollands á dagskrá. Þar í borg komst Wow Air líka á gott skrið og flaug þangað tvisvar á dag líkt og Icelandair.
Þrátt fyrir þessa miklu umferð frá Keflavíkurflugvelli þá hefur KLM, stærsta flugfélag Hollands, látið Íslandsflug eiga sig.
Þegar Wow Air féll í mars 2019 þá setti dótturfélag KLM, lággjaldaflugfélagið Transavia, hins vegar í sölu flug til Íslands. Áður hafði félagið aðeins flogið hingað frá Orly flugvelli við París.
Næsta sumar munu þotur Transavia fljúga daglega til Keflavíkurflugvallar frá frönsku höfuðborginni en svo tíðar hafa brottfarirnar ekki áður verið. Ferðirnar frá Amsterdam verða aftur á móti aðeins fjórar í viku.
Það gæti þó breyst fyrir sumarvertíðina 2023 segir talsmaður félagsins í svari við fyrirspurn Túrista. Þar segir að markmið Transavia til lengri tíma sé að fljúga daglega til Íslands. Það fari þó eftir árangri hvort það gerist þarnæsta sumar eða síðar.
Skýringin á því að KLM hefur ekki hafið flug til Íslands liggur líklegast í tveimur þáttum.
Í fyrsta lagi hefur félagið átt í áratugalöng samstarfi við Icelandair sem skilar hollenska félaginu ófáum farþegum frá Íslandi sem eru á leið í tengiflug frá Schipol. Í öðru lagi þá hefur stór hluti þeirra sem hafa nýtt sér ferðir Icelandair frá Amsterdam í raun verið á leið til Norður-Ameríku en ekki Íslands. Þessi hópur getur líka valið úr fjölda beinna flugferða yfir Atlantshafið með KLM en hluti hans velur frekar að fljúga með Icelandair og millilenda á leiðinni. Við þá ákvörðun vega lægri fargjalda vafalítið þungt.
