Í vor ætlar Play að hefja flug til Bandaríkjanna en ekki liggur fyrir hvaða áfangastaðir verða fyrir valinu. Þeir verða þó ólíklega fleiri en þrír miðað við núverandi áætlun og sex þotur.
Wow Air var með jafn margar flugvélar sumarið 2015 en þá hófst áætlunarflug félagsins til Bandaríkjanna. Þetta var líka fyrra árið sem Wow Air skilaði hagnaði. Áætlanir Play fyrir næsta ár gera líka ráð fyrir því að reksturinn verði réttum megin við núllið.
Fyrstu sumarvertíð Wow Air vestanhafs þá flugu þotur félagsins eingöngu flogið til Baltimore og Boston enda fékk félagið ekki heppilega lendingartíma á flugvöllunum í nágrenni við New York. Það ætti þó að vera auðveldara fyrir Play að komast að á stórum flugvöllunum við heimsborgina nú þegar heimfaraldurinn hefur leikið fluggeirann grátt.
Þotur Wow Air flugu fimm sinnum í viku til Baltimore og alla daga nema laugardaga til Boston. Fastlega má gera ráð fyrir að ferðafjöldinn hjá Play verði ekki minni. Félagið er til að mynda ennþá með laus pláss fyrir daglegar ferðir til þriggja bandarískra borga í sumaráætlun næsta árs.
Þegar kemur að Evrópuflugi þá er nokkur munur á áætlun Wow sumarið 2015 og þeirri áætlun sem Play hefur stillt upp fyrir það næsta.
Í fyrsta lagi þá bauð Wow Air upp á mun tíðari ferðir en Play til helstu áfangastaða. Þannig flugu þotur Wow Air tíu ferðir í viku til Kaupmannahafnar en ennþá eru eingöngu fjórar ferðir í viku á dagskrá Play. Ferðir félagsins til Parísar, London og Berlínar eru jafn margar og því mun færri en Wow Air bauð uppá eins og sjá má á töflunni.
Það er hins vegar möguleiki að koma daglegu morgunflugi til þessara fjögurra borga í núverandi áætlun Play. Þannig er Play aðeins með í sölu 46 ferðir í viku frá Keflavíkurflugvelli næsta sumar en gæti farið upp í 80 ferðir ef flotinn verður nýttur til hins ítrasta. Til samanburðar flugu þotur Wow air 73 ferðir í viku sumarið 2015.
Þegar kemur að fjölda evrópskra áfangastaða þá voru þeir nítján í áætlun Wow sumarið 2015 eða einu fleiri en Play er nú með í sölu. En fastlega má búast við að Play opni fyrir bókanir á flugi til Amsterdam fljólega og þá verða borgirnar jafn margar og þær voru hjá forveranum. Þær eru þó ekki þær sömu eins og sjá má á samantektinni hér fyrir neðan.
