Af þeim fimm þjóðum sem hafa nú þegar tekið frá flestar gistingar á landinu fyrir komandi sumar þá eru Þjóðverjar stórtækastir.
Alla vega þegar horft er til notenda bókunarsíðunnar Booking.com en sú hefur lengi verið umsvifamikil á íslenska markaðnum.
Á þessum tíma árið 2019 var staðan sú sama. Þá áttu Þjóðverjar líka mest bókað samkvæmt nýrri úttekt Booking.com fyrir Túrista. Og það hafa ekki heldur orðið neinar breytingar stöðu Bandaríkjamanna á listanum. Þeir eru sem fyrr í öðru sæti.
Aftur á móti hafa Ítalir farið upp fyrir Frakka á listanum en skýringin á því geti legið í óvenju miklu framboði á flugi milli Íslands og Ítalíu í sumar. Spánverjar sitja svo sem fyrr í fimmta sæti en þessar fimm þjóðir stóðu undir 46 prósent allra seldra gistinátta á skráðum gististöðum hér á landi sumarið 2019.
En þess ber að geta að Booking.com vill ekki upplýsa hver fjöldi bókaðra gistinga er núna miðað við stöðuna á sama tíma árið 2019.
