Wow Air, Norwegian, Vueling hafa öll haldið úti áætlunarflugi frá höfuðborg Ítalíu til Keflavíkurflugvallar og nú fljúga þotur Wizz Air þessa leið þrisvar í viku. Icelandair ætlar líka að spreyta sig á flugi til Rómar og er fyrsta ferða á dagskrá í byrjun júlí.
Þegar þessi áform voru kynnt í ársbyrjun var gert ráð fyrir tveimur ferðum í viku fram í byrjun september. Nú er hins vegar hægt að bóka far með Icelandair beint til Rómar fram í lok október en þá hefst vetraráætlunin formlega. Þotur Icelandair munu því fljúga til Leonardo da Vinci flugvallar tvöfalt oftar en upphaflega var lagt upp með.
Félagið ætlar þó ekki að veita Wizz Air samkeppni í Róm næsta vetur en ungverska flugfélagið gerir ráð fyrir að halda takti í Íslandsfluginu frá Róm fram í lok mars á næsta ári í það minnsta.
Sama dag og Icelandair hóf sölu á farmiðum til Rómar þá kynnti félagið jafnframt áform um áætlunarflug til frönsku borgarinnar Nice. Ferðunum þangað hefur þó ekki verið fjölgað og ennþá bara gert ráð fyrir beinu flugi héðan til suðurhluta Frakklands í tvo mánuði. Ekkert annað flugfélag heldur úti ferðum héðan til Nice.
