Sumaráætlun Icelandair gerði upphaflega ráð fyrir áætlunarferðum til þrettán bandarískra flugvalla í tólf borgum.
Félagið hefur hins vegar tekið úr sölu ferðir sínar til Anchorage í Alaska en þangað flaug félagið reglulega yfir sumarmánuðina áður en Covid-19 kom til sögunnar.
Sumarið 2019 nýttu um 5.500 farþegar sér þetta áætlunarflug og að jafnaði voru þrjú af hverjum fjórum sætum bókuð samkvæmt tölum frá bandarískum flugmálayfirvöldum. Sætanýtingin var þó betri sumarið 2017 eða 81 prósent en rekstur Icelandair hefur verið öfugum megin við núllið allar götur frá árinu 2018.
Evrópubúar á leið í siglingar frá Anchorage hafa verið stór hluti þeirra farþega sem nýtt sér ferðir Icelandair til Anchorage en framboð á Evrópuflugi þangað er lítið. Nú í sumar einskorðast það við ferðir tveggja leiguflugfélaga frá Frankfurt í Þýskalandi.
Þess má geta að tengsl Anchorage við íslenska ferðaþjónustu ná ekki eingöngu til umsvifa Icelandair. Í borginni eru líka höfuðstöðvar tveggja af stærstu hluthöfum í Keahótelanna, Pt Capital og fjárfestingafélags Jonathan B. Rubini. Þessi tvö félög fóru með meirihluta í hótelkeðjunni en eftir gjaldþrot móðurfélags Keahótelanna varð Landsbankinn stærsti hluthafinn með 35 prósent hlut.
