Samkeppnin um farþega á leið milli Íslands og New York í sumar verður hörð enda fjögur flugfélög með daglegar ferðir á þessari leið. Og fargjöldin í júlí hafa hækkað hjá þremur þeirra en aftur á móti lækkað hjá Icelandair líkt og verðkönnun Túrista í síðustu viku sýndi.
Hjá Delta hefur farmiðaverðið farið upp á við og uppselt í hluta af brottförunum í júlí en félagið nýtir breiðþotur í ferðir sína hingað frá JFK flugvelli í New York.
Spurður um þessa stöðu þá segir talsmaður Delta að eftirspurn eftir flugi félagsins til Íslands sé umtalsvert meiri en í fyrra. Bókunarstaðan er góð og í ferðunum frá JFK flugvelli í New York er eftirspurnin sérstaklega mikil eftir sætunum fremst í þotunum, á Delta One farrýminu og eins Delta Premium Select.
Í svari félagsins segir jafnframt að flugið til Íslands hafi alltaf verið mjög vinsælt hjá bandarískum ferðamönnum og útlit fyrir að svo verði líka í ár og margar brottfarir verði uppseldar.
Útiloka ekki veturinn
Fyrstu árin sem Delta flaug hingað til lands þá var ferðunum haldið úti frá vori og fram á haust. Síðar bættust við áætlunarflug yfir vetrarmánuðina en ekki er gert er ráð fyrir þess háttar næsta vetur. Talsmaður Delta segir hins vegar að endurskoðun á vetraráætluninni standi nú yfir og ef það verði gerðar breytingar þá verði tilkynnt um þær með góðum fyrirvara.
