Þrátt fyrir að sextán erlend flugfélög haldi úti áætlunarflugi til Keflavíkurflugvallar þessa dagana þá er hlutdeild þeirra ekki há í samanburði við íslensku flugfélögin tvö.
Í nýliðnum maí voru sex af hverjum tíu brottförum á vegum Icelandair á meðan Play stóð fyrir þrettán prósent af ferðunum. Samanlagt voru öll hin flugfélögin með 28 prósent hlutdeild sem er minna en verið hefur í ár eins og sjá má á grafinu hér fyrir neðan.
Í febrúar var vægi erlendu flugfélaganna fjörutíu prósent en síðan þá hefur fjöldi ferða á vegum Icelandair og Play nærri þrefaldast, farið úr 482 í 1242. Keppinautar íslensku félaganna á Keflavíkurflugvelli hafa aftur á móti fjölgað sínum brottförum um helming eða úr 324 í 480.
Það að íslensk flugfélög haldi uppi samgöngum til og frá Keflavíkurflugvelli eru ekki ný tíðindi. Í maí árið 2018 var hlutdeild Icelandair 47 prósent á meðan Wow Air stóð fyrir þriðju hverri ferð. Ein af hverjum tíu ferðum var á vegum flugfélags Andra Más Ingólfssonar, Primera Air. Erlendu félögin voru þá með rétt um fimmtung af ferðunum.
Gera má ráð fyrir að vægi íslenskra flugrekenda eigi eftir að hækka næstu mánuði í takt við aukin umsvif Play. Auk þess stefnir Icelandair á að ná fyrri styrk á meðan Íslandsflug erlendra flugfélaga er, enn sem komið er, í nokkuð föstum skorðum.
