Ferðalög milli landa voru flókin á tímum Covid-19 og þá ferðuðust Íslendingar innanlands í mun meira mæli en áður. Ásóknin í reykvísk hótel var þó lítil á þessum tíma og mörg þeirra lokuð eða nýtt sem sóttvarnarhótel.
Nú þegar fólk getur ferðast út í heim á ný þá hefur ásókn landans í gistingu í höfuðborginni hins vegar aukist umtalsvert. Fyrstu fjóra mánuði ársins stóðu Íslendingar til að mynda undir miklu fleiri gistinóttum á hótelum höfuðborgarinnar en dæmi eru um. Sérstaklega í mars og apríl eins og sjá má á grafinu hér fyrir neðan.
Í heildina voru gistinætur merktar Íslendingum 90 þúsund talsins í janúar til apríl sem er tvöföldun frá sama tíma árin 2019 til 2021. Í samanburði við fyrstu fjóra mánuðina árið 2018 er nemur viðbótin þriðjungi.
Spurð um þennan fjölda íslenskra hótelgesta í Reykjavík þá bendir Hildur Ómarsdóttir, aðstoðarframkvæmdastjóri Icelandairhótelanna, á að viðburðir á vegum fyrirtækja og vinnustaða hafa verið fjölmargir í mars og apríl. Þar á meðal árshátíðir og ráðstefnur enda hafi verið uppsöfnuð þörf fyrir þess háttar samkomur eftir heimsfaraldurinn.
Og þá eru það ekki eingöngu þeir sem koma utan af landi sem gista á hótelunum heldur líka íbúar höfuðborgarsvæðsins.
