Stjórnendur flugfélaga hafa litlar áhyggjur þurft að hafa af sölu flugmiða að undanförnu því eftirspurnin hefur aukist gríðarlega eftir að sóttvarnaraðgerðir heyrðu sögunni til. Framboðið í sumar er líka minna en í eðlilegu árferði og við þessar aðstæður hækka fargjöldin eins og uppgjör flugfélaga sýna.
Þannig voru tekjur Icelandair á hvern farþega hærri á síðasta ársfjórðungi en þær voru árið 2019. Þó verður hafa verður í huga að félagið bókfærði skaðabætur frá Boeing sem farþegatekjur það ár.
Ef við horfum hins vegar til þróunarinnar í ár þá hækkuðu einingatekjur Icelandair um 23 prósent milli fyrsta og annars ársfjórðungs. Hjá hinu finnska Finnair nam hækkunin 21 prósenti en önnur norræn flugfélög hafa ennþá ekki birt uppgjör sín fyrir fjórðunginn.
Á sama tíma og tekjurnar rjúka upp þá hækkar kostnaðurinn sem skrifast á miklu hærra eldsneytisverð. Einingakostnaður að frátöldum olíukaupum hefur hins vegar lækkað umtalsvert. Sérstaklega hjá Icelandair þar sem hann lækkaði um nærri þriðjung milli fyrstu tveggja ársfjórðung.
Hjá finnska félaginu lækkaði hann um tíund en þess ber að geta að Finnair á í vanda með að halda úti eðlilegri starfsemi. Ennþá eru sóttvarnaraðgerðir almennar á helstu mörkuðum félagsins í Asíu og þangað þurfa þoturnar að fljúga lengri leið en áður þar sem rússnesk lofthelgi er lokuð. Kostnaðurinn við finnsku útgerðina er því hærri en ella. Stjórnendur Icelandair þurfta ekki að takast á við þessa snúnu stöðu.
Hér fyrir neðan má sjá hvernig einingatekjur og -kostnaður Icelandair hefur þróast að undanförnu í krónum talið en Icelandair birtir þessar upplýsingar í bandaríkjadollurum. Túristi mun birta frekari samanburð á uppgjör Icelandair og annarra flugfélaga þegar tilefni gefst til. Það er hins vegar nærri mánuður í að stjórnendur Play birti sitt uppgjör fyrir apríl til júní.
