Þrátt fyrir að Íslendingar hafi á nýjan leik fjölmennt til útlanda í sumarfríinu þá jókst notkun íslenskra greiðslukorta í veitingageiranum hér á landi umtalsvert nú í sumar. Í heildina nam innlenda kortaveltan 23 milljörðum króna sem er viðbót um rúma tvo milljarða kr. frá því í fyrrasumar. Til viðbótar tvöfaldaðist notkun erlendra greiðslukorta í takt við aukin straum erlendra ferðamanna hingað til lands.
Í heildina gerðu viðskiptavinir veitingageirans því upp reikninga upp á um 38 milljarða króna með greiðslukortum samkvæmt tölum Rannsóknarseturs verslunarinnar. Þetta jafngildir aukningu um 39 prósent frá sumrinu 2019 en verðlag hér á landi hefur að meðaltali hækkað um 18 prósent frá þeim tíma.
Kortanotkun í veitingageiranum hefur því aukist langt umfram almennar verðalagshækkanir.
Og það eru heimamenn sjálfir sem standa undir meirihluta veltunnar sem fyrr. Íslensk kort voru þannig nýtt til að greiða fyrir sex af hverjum tíu krónum sem rukkaðar voru fyrir veitingar. Þetta er álíka hlutfall og var áður kórónuveirufaldurinn hófst eins og sjá má á neðra grafinu.