Það voru þrjú norræn flugfélög sem hófu starfsemi í heimsfaraldrinum, Norse og Flyr í Noregi og svo Play. Markaðsvirði þess íslenska hefur lækkað mun minna í ár en þeirra norsku.
Gengi hlutabréfa Flyr hefur fallið um 61 prósent og virði félagsins er núna rétt um 4,6 milljarðar íslenskra króna. Bréfin í Norse hafa lækkað um 55 prósent í ár og markaðsvirði félagsins komið niður í 7,2 milljarða kr. Lækkun ársins nemur 22 prósentum hjá Play og markaðsvirði félagsins í dag nemur 12,8 milljörðum kr.
Íslenska félagið er því einum milljarði verðmætara í dag en Flyr og Norse samanlagt enda fengu bæði félögin mikinn skell í norsku kauphöllinni í vikunni eins og sjá má hér fyrir neðan.
Áætlunarflug á vegum Norse hófst fyrst í byrjun þessa sumars á meðan Flyr og Play hófu leikinn í lok júní í fyrra. Stjórnendur Norse hafa ekki ennþá birt uppgjör í ár en það hafa kollegar þeirra hjá hinum félögunum gert.
Og samkvæmt þeim þá tapaði Flyr 9,1 milljarði íslenskra kr. á fyrri helmingi ársins en tapið hjá Play var fimm milljörðum lægra eða 4,1 milljarður kr. fyrir skatt. Farþegahópurinn hjá Flyr var hins vegar fjölmennari því hann taldi 639 þúsund farþega á meðan 236 þúsund flugu með Play. Tap á hvern farþega hjá Flyr var því um 14.300 kr. en 17.300 kr. hjá Play.
Þessar tölur segja þó ekki alla söguna því Play safnaði meira hlutafé í byrjun en Flyr. Stjórnendur þess síðarnefnda hafa því þurft að efna til tveggja hlutafjárútboða í í ár vegna fjárskorts en hætt var við síðara útboðið því gengi hlutabréfanna var komið undir boðað útboðsgengi.
Viðskiptamódel félaganna er líka ólíkt. Flyr er stórtækt í innanlandsflugi í Noregi en býður líka upp á ferðir frá stærstu borgum Noregs til fjölmargra áfangastaða í Evrópu. Play er hins vegar að hasla sér völl í flugi milli Norður-Ameríku og Evrópu.
Og á þeim markaði er félagið í samkeppni við hið fyrrnefnda Norse. Það félag heldur í dag úti áætlunarflugi til Bandaríkjanna frá Ósló, London og Berlín en í vikunni gáfu stjórnendur Norse út að horfurnar fyrir veturinn væru ekki eins góðar og reiknað hafði verið með. Sú tilkynning hafði mjög neikvæð áhrif á gengi hlutabréfanna eins og sjá má hér fyrir neðan.
