Í kjölfar tveggja flugslysa, þar sem 346 manns misstu lífið, voru allar Boeing Max þotur kyrrsettar í mars 2019. Þegar þarna var komið við sögu voru eingöngu Max8 og Max9 þotur komnar í loftið en Boeing var þó að leggja lokahönd á fyrstu eintökin af minni og stærri útgáfu af flugvélinni, Max7 og Max10.
Rúmum þremur árum síðar bíða flugfélögin sem keyptu þessar nýju týpur ennþá því bandarísk flugmálayfirvöld hafa ekki gefið samþykki sitt notkun vélanna. Og til að bæta gráu ofan á svart þá ganga í gildi nýja reglur um áramótin sem kveða á um að allar nýjar farþegaþotur, sem afhentar eru í Bandaríkjunum, skuli vera með öflugara viðvörunarkerfi í flugstjórnarklefanum en er í Max þotunum í dag.
Boeing er því í kapphlaupi við tímann enda ljóst að það mun reynast fyrirtækinu dýrt að uppfæra kerfin i samræmi við nýju reglurnar.
Forstjóri Boeing gaf það þó út fyrr í haust að hann ætti ekki von á því að Max10 þoturnar fengju grænt ljós fyrir áramót en sagðist vongóður um að Max7 kæmust í loftið.
Nú herma heimildir Wall Street Journal að bandarísk flugmálayfirvöld telji þau gögn sem Boeing hefur lagt fram um öryggisbúnað Max7 þotanna vera ófullnægjandi. Og þar með stefni í að ekki einu sinni þessi minnsta týpa af Max þotunni komist í loftið áður en hinar hertu öryggiskröfur ganga í gildi eftir rúma tvo mánuði.