Nú í morgun hófst sala á 78 milljón hlutum í flugfélaginu Play og geta núverandi hluthafar bætt við sig fleiri bréfum fram til klukkan 18 á miðvikudag. Hver hlutur er seldur á 14,6 krónur sem er nokkru hærra verð en býðst á markaðnum í dag. Gengið hefur nefnilega lækkað jafnt og þétt frá því að uppgjör fyrir þriðja ársfjórðung var birt þann 3. nóvember síðastliðinn eins og sjá má hér fyrir neðan.
Gengið núna er um 13 krónur á hlut.
Birgir Jónsson, forstjóri Play, hefur áður sagt að hann eigi ekki sérstaklega von á því að mikið komið inn í hlutafjárútboðinu enda sé það haldið til að gæta jafnræðis meðal hluthafa og bjóða öllum sömu kjör á viðbótarhlutafé.
„En það væri gaman ef smærri hluthafar vildu taka þátt en það er ekki stórt atriði. Félagið er sterkara eftir þessa aukningu frá þeim stærstu og það er öllum hluthöfum til hagsbóta líka,“ útskýrði Birgir og vísaði til þess að 20 stærstu hluthafar Play hafa skuldbundið sig kaupa nýtt hlutafé fyrir 2,3 milljarða króna.
Um er að ræða 158 milljónir hluta sem seldir voru á 14,6 krónur hver og einn. Þegar þessi hlutabréf verða skráð í kauphöllina, í byrjun næsta mánaðar, má búast við að markaðsvirði Play verulega. Þannig er virði félagsins núna 9,2 milljarðar króna en það hækkar um tvo milljarða þegar nýju bréfin bætast við ef gengið verður álíka og það er núna.
Markaðsvirðið hækkar svo um einn milljarð til viðbótar og fer upp í 12 milljarða ef allir hlutirnir sem settir voru í sölu í morgun verða keyptir. Markaðsvirði Play var síðast það hátt í lok september sl. en það hefur hæst farið upp í 20 milljarða kr.
Sem fyrr segir er gengi hlutabréfanna Play nokkuð undir útboðsgenginu en fjárfestar fá rétt til að kaupa fjórðung til viðbótar, á gengingu 14,6 kr. á hlut, í byrjun þarnæsta árs.
