Miðborg Kaupmannahafnar iðar af lífi á gamlársdegi. Íbúar og ferðamenn flykkjast í verslanir eftir aðföngum fyrir hátíðarhöld kvöldsins. Meðal þeirra staða sem höfðu opið var Glyptoteket og kunnu útlendir ferðamenn vel að meta það, stríður straumur fólks lá inn á safn gamla bruggarans, Carl Jacobsen.
Enn meiri fjöldi var samankominn á matarmarkaðnum í Torvehallerne. Þar létu ferðamenn sig hafa það standa lengi í biðröð eftir smørrebrød og øl. Þeir kröfuharðari settust niður með ostrur og kampavín í tilefni áramótanna. Torvehallerne draga til sín um 115 þúsund Kaupmannahafnarbúa vikulega og margir voru þar í dag að kaupa eitthvert lostæti fyrir áramótaveisluna.
Vinsældir Kaupmannahafnar sem ferðamannaborgar hafa aukist ár frá ári (ef við undanskiljum heimsfaraldurinn leiðinlega). Ekki þarf að hafa mörg orð um það við lesendur Túrista, sem geta eins og aðrir landsmenn valið um mikinn fjölda flugferða í hverri viku til gömlu höfuðborgarinnar við sundin.
Það er uppgangur í danskri ferðaþjónustu og útlitið er gott, eins og fram kemur í nýársgrein Jan Olsen, forstjóra Ferðamálaráðs Danmerkur (VisitDanmark) á ferðavefnum Standby.dk. Hann segir ferðaþjónustuna efnahags- og samfélagslega mjög mikilvæga fyrir Danmörku. Tekjur af henni námu 139 milljörðum danskra króna árið 2019. Rúmir 56 milljarðar fóru í skatta og gjöld. Íslenskir lesendur mega margfalda þessar tölur með 20 ef það hjálpar til að skilja mikilvægið.
Jan Olsen leggur áherslu á að efnahagslegir hvatar stuðli að velgengni ferðaþjónustunnar. Það verði að kosta nokkru til í að auka þekkingu erlendis á kostum Danmerkur sem ferðamannalands. Hann þakkar sérstöku framlagi ríkisins í kjölfar kórónaveirufaraldursins að hægt var að auka markaðskynningu. Það hafi t.d. skilað sér í mikilli fjölgun gesta frá Þýskalandi og Hollandi. Það stefni í að 2022 verði metár í ferðaþjónustunni – slái við árinu 2019.
Forstjóri Ferðamálaráðs Danmerkur segir hinsvegar óvissu vera framundan þegar horft er til ársins 2023. Enginn veit hvernig árásarstríð Rússa í Úkraínu þróast og það sama má segja um orkukreppuna, verðbólguna og lífskjararýrnun í Evrópu. Ferðaþjónustan hljóti að gjalda fyrir þetta ástand.
Árið 2022 kemst þó ekki inn sögubækur danskrar ferðaþjónustu fyrir það eitt að ferðamennirnir hafi skilað sér vel eftir heimsfaraldurinn heldur líka fyrir straumhvörf hvað varðar opinbera sjálfbærnistefnu. Ekki er lengur einblínt á efnahagslegu áhrifin, vöxt og gistináttafjölda, heldur voru sett markmið í samfélags- og umhverfismálum.
Í Danmörku er almennur skilningur meðal íbúa á mikilvægi ferðaþjónustunnar fyrir þjóðarhag og þróun samfélaga vítt og breitt um landið. Ferðamennirnir bæta líf íbúanna á svo mörgum sviðum: Fleiri menningarviðburðir, fleiri veitingahús og verslanir. Fleira fólk og meiri neysla hefur áhrif á umhverfi og við þeim eru Danir að bregðast.
Stefnan er sett á það markmið að Danmörk verði árið 2030 talin umhverfisvænsti áfangastaður í Norður-Evrópu. Við þessi áramót stendur Danmörk bæði Svíþjóð og Noregi að baki í þeim efnum. Ef takast á að minnka losun á CO2 um 70 prósent fyrir árið 2030 er eins gott að spýta í lófana.
En í kvöld fagna Danir og gestir þeirra nýju ári, skála í kampavíni, eplasafa eða danskvand og segja:
Godt nytår!
