Samtök flugrekenda í Bandaríkjunum, Airlines for America, gera ráð fyrir að 2,6 milljónir farþega fljúgi að meðaltali á degi hverjum til loka aprílmánaðar en það er fjölgun um eitt prósent frá 2019. Mars og apríl eru vinsælir ferðamánuðir vestra vegna skólaleyfa og sóknar margra í hlýindi, t.d. á Flórída og í Arizona.
Bandarísku flugfélögin gera ráð fyrir mikilli spurn eftir farmiðum en þó hafa flugáætlanir verið skornar niður um 10 prósent frá 2019, samkvæmt Airline Weekly. Nú komast einfaldlega fleiri farþegar í hvert flug: Notaðar eru fleiri stærri flugvélar með meiri flutningsgetu, fleiri sætaröðum er komið fyrir í hverja vél. Þá ætla lággjaldaflugfélög, sem eru utan samtakanna Airlines for America, að stórauka framboð sitt á ferðum. Þetta eru félög eins og Allegiant Air og Frontier Airlines. En á sama tíma og almennum farþegum fjölgar í flugi í Bandaríkjunum þá hafa viðskiptaferðir ekki tekið við sér að sama skapi. Menn vöndust fjarfundum í faraldrinum og jafnframt er þrýst á að fyrirtæki að minnka kolefnisspor sitt.
Missjafnt er eftir markaðssvæðum hversu vel flugumferð frá Bandaríkjunum hefur tekið við sér. Mikil aukning er í flugi til Mexíkó, flug til Frakklands er álíka og fyrir heimsfaraldur, en töluvert færri en áður fljúga til Brasilíu, Hawaii, Japans, Kína og Ástralíu. Þá mælist 17 prósenta samdráttur í ferðum til vinsælasta áfangastaðar bandarískra ferðamanna, Kanada, miðað við árið 2019.
Flugrekendur vestra náðu að snúa tapi í örlítinn hagnað á síðasta ári. Afkoma flugfélaganna var mun lakari en almennt í fyrirtækjarekstri vestra og skýrist það að mestu á háum vöxtum sem greiða þarf af dýrum fjárfestingum, verðhækkun á olíu og launahækkunum. Eins og gefur að skilja hefur mjög fjölgað í starfsliði bandarísku flugfélaganna eftir að kórónaveirufaraldrinum lauk eða um hátt í 100 þúsund á síðustu tveimur árum. Þá hafa flugfélögin ráðist í gríðarmiklar fjárfestingar, bæði í nýjum flugvélum og í bættri tækni til að laga þjónustu, sem oft er gagnrýnd. Flugfélögin þrýsta líka stöðugt á meiri fjárframlög stjórnvalda í að styrkja og bæta flugumferðarstjórn og í uppbyggingu innviða.