Þegar verkfall flugmanna SAS hófst í byrjun júlí í fyrra lögðu stjórnendur flugfélagsins inn beiðni hjá bandarískum dómstólum um gjaldþrotavernd, svokallað Chapter-11 ferli. Umsóknin var samþykkt og síðustu misseri hefur verið unnið að fjárhagslegri endurskipulagningu þessa stærsta flugfélags Norðurlanda.
Skuldir hafa verið afskrifaðar og samið hefur verið á upp á nýtt við flugvélaeigendur en SAS, líkt og mörg önnur flugfélög, leigir stærsta hluta af þeim þotum sem nýttar eru í rekstrinum.
Nú í morgun sendi SAS svo út tilkynningu þar sem segir að nú sé tímabært að taka næsta skref í ferlinu og hefja söfnun nýs hlutafjár.
Það liggur þó ekki fyrir á hvaða gengi nýju hlutabréfin verða seld eða hvort gamla hlutaféð verði einhvers virði en stjórnendur SAS óska eftir því að áhugasamir fjárfestar gefi sig fram. Er þá aðeins horft til stórra fjárfesta og danska ríkisins eins og bent er á í tilkynningu morgunsins.
Ráðamenn í Danmörku hafa nefnilega gefið út að ríkissjóður landsins muni taka þátt í hlutafjáraukningu SAS, bæði með því að breyta skuldum í hlutafé og eins með kaupum á nýju.
Hinn aðaleigandinn, sænska ríkið, ætlar aftur á móti að sitja hjá nema hvað Svíar eru til í að breyta kröfum í hlutafé. Sömu sögu er að segja af Norðmönnum en norska ríkisstjórnin seldi allan sinn hlut í SAS sumarið 2018 en lánaði félaginu umtalsverðar upphæðir í heimsfaraldrinum.
Um helmingur af því fjármagni sem stendur til að safna í komandi hlutafjárútboði fer í að greiða upp lán sem SAS tók til að koma sér í gegnum fyrrnefnt Chapter-11 ferli. Lánveitandinn er bandarískum sjóður sem ber heitið Apollo Management og hefur verið skilgreindur sem hrægammasjóður í skandinavísku pressunni.
Apollo hefur stundað það síðustu ár að lána flugfélögum í Norður- og Suður-Ameríku, sem komin eru á vonarvöl, umtalsverðar upphæðir en fengið í staðinn forkaupsrétt á nýju hlutafé. Þennan rétt hefur sjóðurinn nýtt sér og búist er við að Apollo verði einn stærsti, ef ekki stærsti, hluthafinn í SAS þegar komandi hlutafjárútboð klárast líkt og Túristi fór yfir í fréttaskýringu nýverið.
Þar var bent á að stærsti hluthafi Icelandair er bandarískur sjóður sem róið hefur á sömu mið og Apollo.
