„Þetta tekur tíma og það getur komið eitt og eitt bakslag. Það þýðir ekki að við eigum að gefast upp. Tækifærin eru fyrir hendi,“ sagði Sigurður Ingi Jóhannsson innviðaráðherra um ákvörðun stjórnenda þýska flugfélagsins Condor að hætta við flug til Akureyrar og Egilsstaða í sumar. Fyrstu ferðir voru á dagskrá nú í maí og ætlunin var að fljúga vikulega til bæjanna tveggja fram á haust.
Þýska flugfélagið felldi hins vegar niður allt Íslandsflug sumarsins í lok mars sl. og var sú skýring gefin að fyrirvarinn hafi verið of skammur. Það var samt í júlí í fyrra sem sala hófst.
Núna eru aðeins eitt ár í að sumarvertíðin 2024 hefjist og miðað við fyrri reynslu þá þyrfti Condor að gefa það út á næstu vikum hvort Íslandsflug verði á dagskrá á næsta ári eða ekki. Spurð hvort ákvörðun liggi fyrir þá segir talskona Condor að viðræður standi yfir við flugvellina sem um ræðir og upplýst verði um nýja áfangastaði næsta árs þegar flugáætlunin liggi fyrir.
Óhentug flugáætlun
Dagskrá Condor fyrir sumarið í ár gerði ráð fyrir að þotur félagsins myndu lenda á Akureyri og Egilsstöðum stuttu fyrir miðnætti. Þar af leiðandi hefðu þýsku farþegarnir þurft að fá í gistingu skammt frá flugvöllunum fyrstu nóttina í það minnsta. Það gekk ekki eftir samkvæmt því sem Túristi kemst næst enda skortur á hótelherbergum fyrir norðan og austan yfir hásumarið.
Og það útlit fyrir að þetta verði áfram vandamál á næsta ári. Þannig gera áform Íslandshótela um byggingu hótels á Sjallareitnum á Akureyri ráð fyrir að sá gististaður verði í fyrsta lagi tekinn í gagnið árið 2025.
Svæðið kallar á fjármagn
Ekkert stórt hótel í byggingu fyrir austan en fjárfestingar í ferðaþjónustu á Austurlandi voru til umræðu á fundi á Egilsstöðum í síðustu viku. Þar sagði Jóna Árný Þórðardóttir, bæjarstjóri Fjarðabyggðar og fráfarandi framkvæmdastjóri Austurbrúar, að auka þyrfti fjárfestingar svo hægt væri að halda úti þjónustu allt árið.
„Hvort kemur á undan, hænan eða eggið? Við reyndum að fá hænuna og komumst langt. Nú erum við að tala um eggið. Þetta er ekki spurningin hvort, heldur hvenær – og hversu hratt við komumst. Möguleikarnir og fjárfestingatækifærin eru um allt svæðið. Við þurfum líka að þora að sækjast eftir því að fólk komi með okkur í þessa vegferð – að byggja upp á svæðinu,” sagði Jóna Árný og vísaði þar til áforma Condor sem urðu að engu nú í sumar.
