„Stækkunin hefur verið lengi á teikniborðinu,” segir Daníel Smárason, eigandi Hótels Akureyrar. Hótelið er í tveimur merkishúsum, Hafnarstræti 67 og 73: Skjaldborg var fyrsta húsið á Akureyri sem sérstaklega var byggt fyrir kvikmyndasýningar. Síðar var prentsmiðja í húsinu. Aðeins utar stendur annað gamalt samkomu- og bíóhús, Lón, sem síðar nefndist Dynheimar.
Hótel Skjaldborg og nærliggjandi hús – MYND: ÓJ
Mjög hefur vantað gistirými á Akureyri, sérstaklega á sumrin, en Daníel segir að fyrirhuguð stækkun sé ekki viðbrögð við þeirri umræðu.
„Þetta er rökrétt framhald á þeirri uppbyggingu sem við fjölskyldan höfum unnið að árum saman. Við erum byrjuð á 1.150 fermetra viðbyggingu við Skjaldborg. Þar verða samtals 52 herbergi, ný móttaka og þjónusta á jarðhæð. Opnun er áætluð í desember á þessu ári.”
Horft fram í Eyjafjörð frá Skjaldborg – MYND: ÓJ
En Daníel og fjölskylda ætlar ekki að láta staðar numið eftir stækkun á Skjaldborg
„Á lóð nr. 75 vonumst við til að byggja samskonar hús með tengingu við Hafnarstræti 73. Húsin okkar eru glæsileg og eiga gríðarlega áhugaverða sögu. Við hönnun nýbygginganna teljum við algjört lykilatriði að viðhalda klassískum sjónarmiðum hvað varðar hönnun og útlit.”
Daníel er bjartsýnn á að sumarið verði gott fyrir norðan.
„Sumarið verður gott. Bókanir eru umfram áætlanir. Nýjum veitingastaðnum á jarðhæð hótelsins, North, sem rekinn er af Gunnari Karli og Rafni Svanssyni hefur verið tekið gríðarlega vel og Akureyri iðar af lífi.”
Svona á húsaröðin við Hafnarstræti að líta út – MYND: Hótel Akureyri