Dave Calhoun tók við sem forstjóri Boeing flugvélaframleiðandans undir lok árs 2019 þegar Dennis Muilenberg fékk sparkið í kjölfar þess að tvær 737 MAX-vélar fórust með 346 manns um borð. Calhoun var öllum hnútum kunnugur hjá Boeing enda verið stjórnarformaður fyrirtækisins um langt árabil.
Nú fyrir stundu tilkynnti Boeing að Calhoun muni láta af störfum í lok þessa árs og sömuleiðis Stan Deal sem stýrir þeim hluta Boeing sem hefur með smíði farþegaþota að gera. Sú starfsemi hefur fengið mikla gagnrýni síðustu ár, ekki bara vegna fyrrnefnda flugslysa, heldur endurtekinna galla í þotum félagsins.
„Við höfum stigið markverð skref á síðustu árum til að styrkja öryggis- og gæðaferla okkar en þessi síðustu óhöpp gera okkur algjörlega ljóst að við höfum enn verk að vinna,“ sagði Calhoun til að mynda í bréfi til starfsfólks í janúar sl. í kjölfar þess að stærðarinns gat kom á skrokk nýrrar Boeing Max þotu.