Framkvæmdastjórn Evrópusambandsins tilkynnti á mánudag að hún hefði hafið rannsóknir á bandarísku tæknirisunum Alphabet, móðurfélagi Google, Apple og Meta sem rekur Facebook og Instagram.
Rannsóknin snýr að mögulegum brotum fyrirtækjanna þriggja á lögum ESB um hinn stafræna markað. Þessi lög tóku nýverið gildi en tilgangur þeirra er að koma í veg fyrir yfirburði fárra netfyrirtækja, svokallaðra „hliðvarða“, á evrópska markaðnum.
Rannsaka á Alphabet og Apple vegna gruns um að þau heimili ekki utanaðkomandi aðilum að beina notendum frá appverslunum tæknirisanna. Þess í stað sé umferðinni stýrt til Apple og Alphabet sem taki til sín þóknanir af öllu því sem þar er selt, til dæmis áskriftir af streymisveitum og fjölmiðlum.
Alphabet verður einnig tekið til skoðunar vegna Google Flights og Google Hotels sem mögulega njóta forgangs á Google leitarvélinni að því fram kemur í tilkynningu frá ESB.
Rannsóknin á Met snýst helst að því hvort notendur Facebook og Instagram fái nægjanlegt val þegar kemur að deilingu á persónuupplýsingum en þau gögn hefur Meta í áraraðir notfært sér til að beina sérniðnum auglýsingum að notendum sínum. Í staðinn borgar fólk ekki fyrir að nota samfélagsmiðla fyrirtækisins.
Gert er ráð fyrir að rannsóknin taki allt að eitt ár en verði fyrirtækin fundin sek geta þau átt von á sekt sem jafngildir allt að tíund af veltu þeirra á heimsvísu í eitt ár.
Tekjur Apple námu 385 milljörðum dala á síðasta ári, Alphabet velti 307 milljörðum dala og Meta 134 milljörðum.