Sumaráætlun fluggeirans hefst formlega í lok mars og stendur yfir í sjö mánuði. Um þessar mundir eru flugfélög því að leggja lokahönd á skipulag komandi vertíðar. Jafnvel þó óvissan um hversu góð hún verður sé ennþá mikil.
Hluti af þeim undirbúningi er að tryggja sér hentuga lendingartíma á flugvöllum. Og eitt þeirra flugfélaga sem hefur tekið frá tíma á Keflavíkurflugvelli næsta sumar er kanadíska flugfélagið WestJet en það hefur hingað til ekki spreytt sig á Íslandsflugi.
Félagið var reyndar með frátekna lendingartíma á Keflavíkurflugvelli síðasta sumar fyrir flug hingað frá Toronto í Kanada. Stjórnendur WestJet tóku hins vegar ákvörðun löngu fyrir Covid-19 að hefja ekki flug til Íslands þá.
Fyrir komandi sumarvertíð hefur WestJet aftur tekið frá lendingartíma á Keflavíkuflugvelli, bæði fyrir flug frá Toronto en líka Calgary. Sú síðarnefnda er fjórða fjölmennasta borg Kanada og er í fylkinu Alberta. Í því fylki er líka borgin Edmonton sem þotur Icelandair hafa flogið til síðustu ár en flugfélagið geri þó ekki ráð fyrir að taka upp þráðinn þar í borg í sumar.
Aftur á móti flýgur Icelandair til Toronto, Montreal og Vancouver og Air Canada býður jafnframt upp á Íslandsflug frá þeim tveimur fyrrnefndu. Ef WestJet blandar sér í slaginn þá er útlit fyrir tíðar ferðir hingað frá Toronto næsta sumar.
Til viðbótar horfa forsvarsmenn Play líka til Kanada líkt og Túristi greindi frá í gær.
Talsmaður WestJet vill ekki segja af eða á hvort af flugi félagsins hingað verður næsta sumar. Í svari til Túrista segir að WestJet, líkt og svo mörg önnur flugfélög, sæki um afgreiðslutíma víða um heim til að öðlast skilning á því hvar lendingarleyfi eru á lausu en líka til að halda möguleikum opnum.
