Þeir sem eru á leið til útlanda á næstunni gætu þurft að bíða lengur en vanalega eftir því að sýna passana sína. Þeir sem eru á leið til útlanda á næstunni gætu þurft að bíða lengur en vanalega eftir því að sýna passana sína.
Ef af vinnustöðvun félagsmanna í SFR verður á fimmtudaginn mun hún hafa áhrif víða í samfélaginu og líka í Flugstöð Leifs Eiríkssonar. Samkvæmt upplýsingum frá Isavia, rekstraraðila Keflavíkurflugvallar, mun áhrifanna helst gæta í landamæravörslu því færri landamæraverðir yrðu á vakt á meðan vinnustöðvuninni stendur. Það mun því væntanlega taka lengri tíma fyrir þá sem eru á leið til landa utan Schengen svæðisins að komast í gegnum flugstöðina. Farþegar á leið til N-Ameriku ættu að hafa þetta í huga og leggja fyrr af stað út að brottfararhliðinu en ella.
Að öðru leyti ætti starfsemi á Keflavíkurflugvelli ekki að riðlast vegna verkfalla SFR og fleiri félaga sem boðuð hafa verið á fimmtudaginn. Ef ekki semst munu allir félagsmenn SFR leggja niður störf tímabundið á fimmtudag og föstudag og svo aftur mánudaginn 19. og þriðjudaginn 20. október. Allsherjarvinnustöðvun verður svo endurtekin 29. og 30. október, 2. og 3. nóvember og 12. og 13. nóvember.
Verkföll munu hægja á vegabréfaskoðun í Leifsstöð
