Umræða um hertari aðgerðir við evrópsk landamæri, vegna útbreiðslu delta-afbrigðis kórónaveirunnar, einkenndu umræðuna í vikunni sem nú er á enda. Og það er líklega megin skýringin á því að gengi hlutabréfa í flugfélagum lækkaði umtalsvert í kauphöllum Norðurlanda frá mánudegi til föstudags.
Þannig dróst verðmæti Norwegian saman um 13,13 prósent og hjá Finnair nam lækkunin tíund. Hún var litlu minni hjá Icelandair.
Gengi hlutabréfa í hinu nýja Flyr í Noregi féllu hins vegar minnst af norrænu flugfélögum sex sem skráð eru á hlutabréfamarkað. Lækkunin þar var 2,6 prósent en aftur á móti lækkaði gengi Play um 6,5 prósent eins og sjá má á grafinu.
Það voru þó ekki bara norræn flugfélög sem fundu fyrir mótbyr í liðinni viku því nýjustu vendingar í kórónuveirufaraldrinum höfðu líka neikvæð áhrif á gengi stórra evrópskra flugfélaga.
