Samfélagsmiðlar

Allar flugferðir Bændaferða kolefnisjafnaðar

Framkvæmdastjóri ferðaskrifstofunnar segir mikilvægt að fyrirtækið sjálft leggi sitt af mörkum í stað þess að láta viðskiptavininn einan bera ábyrgð á kolefnisjöfnuninni.

Frá og með áramótum verða allar flugferðir á vegum Bændaferða kolefnisjafnaðar með jöfnu framlagi þess sem ferðast og ferðaskrifstofunnar. Bændaferðir leggja kolefnisjöfnunina því ekki eingöngu á herðar viðskiptavina sinna eins og oft tíðkast.

Aðspurður um ástæður mótframlagsins þá segir Sævar Skaptason, framkvæmdastjóri Bændaferða, að helsta röksemdin sé sú að þetta styðji við samfélagslega ábyrgð ferðaskrifstofunnar. „Fyrirtækin verða líka að leggja sitt af mörkum ekki bara skella ábyrgðinni á viðskiptavininn.“

Framlag viðskiptavina er innifalið í heildarverði ferða en í útreikningum á útblæstri er notast við reiknivél Alþjóða flugmálastofnunar. Verður kolefnið bundið með landgræðslu, skógrækt og endurheimt votlendis en andvirði þess sem safnast í kolefnisjöfnuninni mun renna í sérstakan sjóð sem verður formlega settur á fót á vorhátíð Hey Iceland þann 2. apríl næstkomandi og verður fyrsta úthlutun úr sjóðnum í upphafi árs 2021.

„Við gerum okkur grein fyrir því að skógræktin dugar ekki ein og sér og þess vegna er markmiðið að fara blandaða leið og m.a. skoða betur útfærslur með endurheimt á votlendi þannig að kolefnisjöfnunin almennt sé ekki að taka svona langan tíma. Við ætlum að fá sérfræðinga með okkur í lið til að útfæra þetta betur með tillit til verkefna sem munu fá úthlutun úr sjóðnum. Í dag eru bændur í lykilstöðu við að binda kolefni í jörðu og því er þetta samstarf við grasrótina í fyrirtækinu mikilvægt,“ segir Sævar.

Bændaferðir og Hey Iceland eru vörumerki Ferðaþjónustu bænda hf. sem sérhæfir sig í ferðaþjónustu á landsbyggðinni og ferðum út fyrir landsteinana. Fyrirtækið hefur unnið eftir sjálfbærnistefnu frá árinu 2002 og er unnið að fleiri verkefnum innan þess sem snúa að því að draga úr kolefnisfótspori vegna ferðalaga.

Þannig var fyrsti rafbíla-ferðapakkinn fyrir erlenda viðskiptavini settur í loftið í samstarfi við Bílaleigu Akureyrar síðastliðið sumar. Þessi ferðapakki er sprottinn upp af verkefninu Hleðsla í hlaði, samstarfsverkefni Hey Iceland, Bændasamtaka Íslands og Orkuseturs sem hefur það markmið að fjölga hleðslustöðvum fyrir rafbíla í sveitum landsins.

Í dag eru tólf félagar innan Hey Iceland komnir með hleðslustöðvar og fer þeim fjölgandi sem opnar nýja möguleika fyrir þá sem vilja ferðast um landið á rafmagnsbíl.

 

Nýtt efni

Brasilíski flugframleiðandinn Embraer greinir frá góðum gangi í pöntunum og afhendingu véla á fyrstu mánuðum ársins. Mestur var fögnuðurinn í höfuðstöðvunum í São José dos Campos þegar American Airlines staðfesti kaup á 90 farþegaþotum af gerðinni E175, sem verða notaðar í innanlandsflugi og eru hluti af stórri endurnýjun flugflota félagsins. E175 eru meðaldrægar vélar, oftast …

Faxaflóahafnir héldu vorfund sinn fyrir helgi til að kynna fyrirtækjum í ferðaþjónustu skipulag sumarsins við móttöku skemmtiferðaskipa, sem tekur mið af því raski sem verður vegna byggingar farþegamiðstöðvar Faxaflóahafna. Þeim framkvæmdum á að ljúka að tveimur árum liðnum, eins og FF7 greindi nýverið frá. Fram kom á fundinum að gert er ráð fyrir rúmlega 308 …

Fréttaveitan Bloomberg sagði frá því á dögunum að mikil úlfúð ríkti í alþjóðlegu kolefnisvottunarsamtökunum Science Based Targets initiatives, eða SBTi.  Fyrirtæki um allar koppagrundir hafa lengi reitt sig á vottanir frá SBTi þegar þau hafa fullyrt að þau stefni að kolefnishlutleysi.  Yfirleitt er kannski lítil ástæða til þess að fólk kippi sér upp við slæman starfsanda og …

Þegar lent er á flugvelli á ESB-svæðinu bíður farþeganna ekki verslun með tollfrjálsan varning við töskubeltin. Þess háttar er aðeins í boði fyrir brottför. Í Evrópuríkjum utan ESB gefst hins vegar tækifæri til að kaupa ódýrara áfengi við komuna eins og við þekkjum frá Keflavíkurflugvelli. Þeir sem nýta tollinn sinn þar til að kaupa léttvín …

Þrjár þotur Loftleiða munu næstu misseri fljúga viðskiptavinum erlendra ferðaskrifstofa hringinn í kringum heiminn. Um borð eru sætin stærri og færri en í hefðbundnu áætlunarflugi enda kostar ferðalagið skildinginn. Hver farþegi borgar 25 milljónir fyrir ferðalag líkt og farið var yfir í fréttum Stöðvar 2.  Það er ekkert nýtt að Icelandair leigi þotu og áhöfn í …

Fyrir viku hélt Narendra Modi, forsætisráðherra Indlands, fund með helstu ráðgjöfum sínum, innanríkisráðherra og fulltrúum veðurstofu og almannavarna landsins til að ræða viðbrögð við hitatíðinni framundan, frá apríl til júní. Sérstaklega er talin ástæða nú til aðgæslu vegna áhrifa loftslagsbreytinga á veðurfar. Verulegar líkur eru taldar á að hiti fari fram úr venjulegum hámarkshita í …

Frumvarp um að veita þúsundum óskráðra innflytjenda á Spáni heimild til landvistar og atvinnu er nú til meðferðar í fulltrúadeild spænska þingsins (Congreso de los Diputados) eftir að 700 þúsund manns höfðu undirritað áskorun um setningu laga þessa efnis. Nærri 900 samtök studdu þessa áskorun um að breyta stöðu óskráðra útlendinga í landinu.  Ef fyrirliggjandi …