Samfélagsmiðlar

Ferðabann Trump í tölum

Algjört bann verður við flugi frá Íslandi og flestum öðrum Evrópurlöndum til Bandaríkjanna í þrjátíu daga frá og með miðnætti á föstudag. Ástæðan er COVID-19 veikin líkt og fram kom í tilkynningu Donald Trump, forseta Bandaríkjanna, í gærkvöld. Það liggur fyrir að þetta ferðabann mun hafa mikil áhrif á Icelandair og íslenska ferðaþjónustu.

Flugsamgöngur milli Íslands og Bandaríkjanna hafa lengi verið mjög tíðar og vægi bandarískra ferðamanna er því mjög hátt hér á landi. Frá Keflavíkurflugvelli eru farnar fleiri áætlunarferðir til bandarískra borga en frá hinum Norðurlöndunum. Í dag munu þotur Icelandair t.d. fljúga héðan til níu bandarískra flugvalla á meðan farþegum á Kaupmannahafnarflugvelli, fjölförnustu flughöfn Norðurlanda, standa til boða sex ferðir. Brottfarirnar héðan voru þó mun tíðari þegar WOW air var ennþá í loftinu.

Bandarískir ferðamenn hafa líka verið langfjölmennastir í hópi ferðamanna hér á landi en vægi þeirra dróst þó saman þegar WOW air var gjaldþrota. Það hafði einnig neikvæð áhrif að Delta hætti flugi hingað yfir veturinn. Engu að síður var einn af hverjum fimm ferðamönnum hér í apríl í fyrra frá Bandaríkjunum. Þá voru þeir nærri 24 þúsund talsins. Hlutfall bandarískra gistinga á íslenskum hótelum er einnig hátt. Í mars og apríl í fyrra keyptu Bandaríkjamenn um fjórðung af öllum gistingum á íslenskum hótelum og vægi þeirra hefur vafalítið líka verið hátt í öðrum gistikostum þó þær tölur liggi ekki fyrir. Til viðbótar við þetta allt þá má gera ráð fyrir að töluverður fjöldi ferðamanna frá öðrum þjóðum búi í Bandaríkjunum eða ferðist í gegnum landið á leið sinni til Íslands.

Vinsældir Íslands sem áfangastaðar er þó ekki eina ástæðan fyrir því að bandaríski markaðurinn hefur þar með verið Icelandair mikilvægur. Leiðakerfi félagsins byggir í raun á því að stór hluti þeirra sem nýtir sér ferðirnar til og frá Evrópu séu í raun farþegar á leið til Bandaríkjanna. Þeir millilenda þá aðeins hér á landi. Og vegna þess hve vægi þessara skiptifarþega hefur verið hátt í þotum Icelandair þá hefur félagið getað boðið upp á tíðar ferðir til bæði Evrópu og Norður-Ameríku. Næstu þrjátíu daga verður félagið því að troða marvaða og vafalítið fækka ferðunum til Evrópu töluvert á sama tíma og flugið til Bandaríkjanna stöðvast.

Að jafnaði flutti félagið um 3100 farþega á degi hverjum milli Íslands og Bandaríkjanna í mars og apríl í fyrra samkvæmt tölum frá bandarískum flugmálayfirvöldum. Hver farþegi er talinn á leiðinni til landsins og frá og því má segja að um fimmtán hundruð einstaklingar hafi nýtt sér ferðir Icelandair á degi hverjum til og frá Bandaríkjunum þessa tvo mánuði. Í ljósi þess að Icelandair hefur dregið úr ferðum að undanförnum má gera ráð fyrir að farþegafjöldinn hefði verið aðeins minni nú í mars og apríl en samt staðið undir umtalsverður hluta af umsvifum félagsins. Þrjátíu og níu prósent af tekjum Icelandair á síðasta ári komu frá Norður-Ameríku.

Nýtt efni

Sauðfjársetrið var stofnað árið 2002 af heimamönnum og hefur vaxið og dafnað í þeirra umsjá allar götur síðan. Nýverið hlaut það tilnefningu til Íslensku safnaverðlaunanna fyrir samfélagslegra nálgun í safnastarfi. Í umsögn með tilnefningunni segir meðal annars að hér sé um að ræða mikilvæga og öfluga menningarstofnun sem hafi gríðarmikið gildi fyrir samfélagið á Ströndum. …

Unnið er að því á flugvellinum í Nice á Côte d´Azur að rafvæða alla starfsemi hans með 4 milljóna evra fjárstuðningi frá Evrópusambandinu. Er verkefnið liður í loftslagsstefnu sambandsins. Allar flugvélar í stæði eiga að fá aðgang að raforku sem unnin er með endurnýjanlegum hætti. Settar verða upp um 70 tengistöðvar í þessu skyni. Á …

Nýja-Sjáland var á meðal þeirra ríkja sem fylgdu hörðustu lokunarstefnunni á meðan Covid-19 geisaði. Nú vilja stjórnvöld þar blása meira lífi í ferðaþjónustu á landinu og helst utan vinsælasta tímans sem er nýsjálenska sumarið - frá desemberbyrjun til febrúarloka, þegar dagarnir eru langir og sólríkir og nætur mildar.  Ferðaþjónusta er einn helsti atvinnuvegur Nýja Sjálands …

Talsmenn þýsku sambandsstjórnarinnar staðfestu í dag að hún væri að leita lausnar á viðskiptadeilu Evrópusambandsins og Kína. Það fæli væntanlega í sér að boðuð hækkun verndartolla um allt að 38,1 prósent nái fram að ganga. Það er ekki umhyggja fyrir kínverskum hagsmunum sem ræður afstöðu þýskra stjórnvalda heldur vilja þau vernda hagsmuni stórfyrirtækja í eigin …

Schiphol-flugvöllur við Amsterdam er meðal fjölförnustu flugvalla Evrópu og hefur umferðin um hann lengi verið umdeild meðal íbúa. Umfangi flugvallarins, hávaða frá honum og mengun, hefur ítrekað verið mótmælt og brugðist hefur verið við með því að setja takmarkanir á þjónustutíma og fjölda véla sem um hann fara. Schiphol er þó og verður áfram ein …

Verulega hefur dregið úr magni ósoneyðandi gastegunda í andrúmsloftinu og þykir núna nokkuð ljóst, samkvæmt nýrri rannsókn, að hið alþjóðlega átak um að bjarga ósonlaginu hafi tekist framar vonum.  Margir sem komnir eru á miðjan aldur muna eftir brúnaþungum sjónvarpsfréttamönnum segja frá válegum tíðindum af ósonlaginu á níunda og tíunda áratugnum, inni á milli lagstúfa …

Á meðan franskir og spænskir bílaframleiðendur þrýstu á um að Evrópusambandið brygðist hart við meintum óðeðlilega miklum ríkisstuðningi Kínverja við rafbílaframleiðslu sína og hækkuðu verndartolla vöruðu þýskir keppinautar þeirra við því að slegið gæti í bakseglin: Gríðarlega mikilvægur markaður í Kína gæti lokast að verulegu leyti. Um þriðjungur af sölutekjum Mercedes Benz, BMW og Volkswagen …

Óhætt er að segja að það kosti Hlyn Guðjónsson, sendiherra Íslands í Ottawa, mikil ferðalög að sinna íslenskum hagsmunum í Kanada, sem er næst víðfeðmasta land heimsins. Sendiráð Íslands er hinsvegar lítið, starfsmenn aðeins þrír - Hlynur og tveir staðarráðnir. Nýlega var Hlynur staddur í Halifax, höfuðborg Nova Scotia. Það tekur um tvo tíma að …