Aflýsa þarf nokkrum áætlunarflugum á degi hverjum til Keflavíkurflugvallar frá og með næstu viku. Ástæðan er sú að áfram takmarkast fjöldi sýnataka á Keflavíkurflugvelli, vegna Covid-19, við tvö þúsund á dag.
Hingað til hefur flugumferðin verið það takmörkuð að þessu hámarki hefur ekki verið náð. Frá og með næstu viku horfir þó öðruvísi við því þá fjölgar ráðgerðum áætlunarferðum hingað þónokkuð. Þar með stefnir í að farþegafjöldinn fari nokkuð yfir tvö þúsund á dag.
Stjórnendum þeirra flugfélaga sem halda úti flugi til og frá Keflavíkurflugvelli hefur því verið tilkynnt að fella þurfi niður hluta af fluginu hingað til lands strax í næstu viku samkvæmt heimildum Túrista. Ekki mun þó liggja fyrir hvaða ferðir verða felldar niður eða hvaða aðferðum verður beitt við þá vinnu.
Þórólfur Guðnason, sóttvarnalæknir, boðaði í gær breyttar áherslur við landamæraskimun frá og með næstu mánaðamótum. Þá væri hægt að hleypa fleirum inn í landið en nú er gert.
Í dag er Ísland eina opna landið í Evrópu þar sem gerð er krafa um að allir þeir sem koma til landsins gangist undir smitpróf. Sum ríki í álfunni takmarka þó ferðamannastrauminn við sérvalin ríki.
