Samfélagsmiðlar

Geta aðeins mannað tvær til fimm farþegaþotur eftir áramót

Formaður Félags íslenskra atvinnuflugmanna segir Icelandair hafa lítið svigrúm til að bregðast við aukinni eftirspurn. Ástæðan er sú að félagið verður að öllu óbreyttu með mjög fáa flugmenn í vinnu í byrjun næsta árs.

Það eru 139 flugmenn á launum hjá Icelandair í dag en helmingi þeirra, samtals 68 flugmönnum, hefur verið sagt upp frá og með áramótum. Spurður um stöðu mála þá segir Jón Þór Þorvaldsson, formaður Félags íslenskra atvinnuflugmanna, að ekkert sé að frétta af endurráðningum eða afturköllun á uppsögnum.

„Það þarf að gefa úr vinnuskrá flugmanna fyrir janúarmánuð fimmtán dögum fyrir mánaðamót skv. reglugerð. Þannig að endanleg ákvörðun þarf að liggja fyrir á allra næstu dögum.“ 

Icelandair hefur í byrjun vetrar skorið niður flugáætlun sína meira en önnur norræn flugfélög. Með tæplega sjötíu flugmenn í vinnu eftir áramót, að öllu óbreyttu, þá getur félagið í raun aðeins mannað nokkrar flugvélar. Hversu margar í raun og veru segir Jón Þór, formaður FÍA, að byggist á flugáætlun og til hvaða áfangastaða verður flogið. Einnig hefur varavaktaþörf vegna veðurs, viðhalds, veikinda og þjálfana áhrif og líka orlof.

„Icelandair hefur verið að gera ráð fyrir fimm til átta áhöfnum á vél að teknu tilliti til ofangreindra þátta og svo þarf að taka tillit til þeirra flugmanna sem sinna þjálfun og skrifstofustörfum fyrir félagið,“ bætir Jón Þór við.

Hann segir að gróflega megi gera ráð fyrir að flugfélagið geti þá aðeins mannað um fjórar til sjö þotur eftir áramót. Formaður FÍA bendir á að Icelandair sé í dag með tvær fraktflugvélar í fullri notkun og þar með geti félagið aðeins notað tvær til fimm farþegaþotur frá og með áramótum.

„Svigrúmið er lítið sem ekkert til að bregðast við aukinni eftirspurn og það tekur tíma að þjálfa upp flugmenn sem hafa misst vinnuna og þurfa að fara í sí- og endurmenntun. Nýþjálfanir eins og á Boeing 737 Max taka mun lengri tíma eða um 60 daga pr áhöfn þrátt fyrir að menn hafi reynslu af þotuflugi,“ segir formaður FÍA að lokum.

Þess má geta að það voru 562 flugmenn að störfum hjá Icelandair sumarið 2019. Um síðustu áramót var 112 þeirra sagt upp vegna áframhaldandi kyrrsetningar Boeing MAX þotanna. Þar með voru 450 flugmenn með vinnu hjá flugfélaginu en flestir þeirra fengu uppsagnarbréf í vor vegna ástandsins sem Covid-19 hefur valdið.

Nýtt efni

Sauðfjársetrið var stofnað árið 2002 af heimamönnum og hefur vaxið og dafnað í þeirra umsjá allar götur síðan. Nýverið hlaut það tilnefningu til Íslensku safnaverðlaunanna fyrir samfélagslegra nálgun í safnastarfi. Í umsögn með tilnefningunni segir meðal annars að hér sé um að ræða mikilvæga og öfluga menningarstofnun sem hafi gríðarmikið gildi fyrir samfélagið á Ströndum. …

Unnið er að því á flugvellinum í Nice á Côte d´Azur að rafvæða alla starfsemi hans með 4 milljóna evra fjárstuðningi frá Evrópusambandinu. Er verkefnið liður í loftslagsstefnu sambandsins. Allar flugvélar í stæði eiga að fá aðgang að raforku sem unnin er með endurnýjanlegum hætti. Settar verða upp um 70 tengistöðvar í þessu skyni. Á …

Nýja-Sjáland var á meðal þeirra ríkja sem fylgdu hörðustu lokunarstefnunni á meðan Covid-19 geisaði. Nú vilja stjórnvöld þar blása meira lífi í ferðaþjónustu á landinu og helst utan vinsælasta tímans sem er nýsjálenska sumarið - frá desemberbyrjun til febrúarloka, þegar dagarnir eru langir og sólríkir og nætur mildar.  Ferðaþjónusta er einn helsti atvinnuvegur Nýja Sjálands …

Talsmenn þýsku sambandsstjórnarinnar staðfestu í dag að hún væri að leita lausnar á viðskiptadeilu Evrópusambandsins og Kína. Það fæli væntanlega í sér að boðuð hækkun verndartolla um allt að 38,1 prósent nái fram að ganga. Það er ekki umhyggja fyrir kínverskum hagsmunum sem ræður afstöðu þýskra stjórnvalda heldur vilja þau vernda hagsmuni stórfyrirtækja í eigin …

Schiphol-flugvöllur við Amsterdam er meðal fjölförnustu flugvalla Evrópu og hefur umferðin um hann lengi verið umdeild meðal íbúa. Umfangi flugvallarins, hávaða frá honum og mengun, hefur ítrekað verið mótmælt og brugðist hefur verið við með því að setja takmarkanir á þjónustutíma og fjölda véla sem um hann fara. Schiphol er þó og verður áfram ein …

Verulega hefur dregið úr magni ósoneyðandi gastegunda í andrúmsloftinu og þykir núna nokkuð ljóst, samkvæmt nýrri rannsókn, að hið alþjóðlega átak um að bjarga ósonlaginu hafi tekist framar vonum.  Margir sem komnir eru á miðjan aldur muna eftir brúnaþungum sjónvarpsfréttamönnum segja frá válegum tíðindum af ósonlaginu á níunda og tíunda áratugnum, inni á milli lagstúfa …

Á meðan franskir og spænskir bílaframleiðendur þrýstu á um að Evrópusambandið brygðist hart við meintum óðeðlilega miklum ríkisstuðningi Kínverja við rafbílaframleiðslu sína og hækkuðu verndartolla vöruðu þýskir keppinautar þeirra við því að slegið gæti í bakseglin: Gríðarlega mikilvægur markaður í Kína gæti lokast að verulegu leyti. Um þriðjungur af sölutekjum Mercedes Benz, BMW og Volkswagen …

Óhætt er að segja að það kosti Hlyn Guðjónsson, sendiherra Íslands í Ottawa, mikil ferðalög að sinna íslenskum hagsmunum í Kanada, sem er næst víðfeðmasta land heimsins. Sendiráð Íslands er hinsvegar lítið, starfsmenn aðeins þrír - Hlynur og tveir staðarráðnir. Nýlega var Hlynur staddur í Halifax, höfuðborg Nova Scotia. Það tekur um tvo tíma að …