Í komandi sumaráætlun Icelandair er gert ráð fyrir að heildarsætaframboð félagsins dragist saman um 25 til 30 prósent í samanburði við sumarið 2019. Engu að síður sótti Icelandair um ríflega helmingi fleiri lendingarleyfi eða slott á Keflavíkurflugvelli fyrir næsta sumar en félagið hafði áður en heimsfaraldurinn braust út.
Í heildina er Icelandair með um 37 þúsund slott fyrir sumaráætlunina 2021 samkvæmt heimildum Túrista. Fyrir sama tímabil árið 2019 sótti félagið um ögn færri lendingarleyfi eða 36 þúsund en notaði tæplega 20 þúsund þegar upp var staðið.
Sumarið 2020 var ætlunin að fjölga slottunum um fimmtán af hundraði en vegna útbreiðslu Covid-19 urðu umsvifin miklu minni.
Spurð um skýringar á þessum fjölda umsókna á lendingarleyfum fyrir næsta sumar þá segir Ásdís Ýr Pétursdóttir, upplýsingafulltrúi Icelandair, að þetta snúist um að viðhalda verðmætum afgreiðslutímum á flugvöllum erlendis.
Það liggur þó fyrir að umsóknir á lendingarleyfum fyrir komandi sumar gæti haft gildi til langrar framtíðar. Ástæðan er sú að vegna heimsfaraldursins þá er til skoðunar að fella niður kröfuna um að flugfélög nýti hvert og eitt lendingarleyfi í að minnsta kosti áttatíu prósent tilvika næsta sumar. Þess háttar undantekning var gerð fyrir síðasta sumar og aftur nú í vetur.
Ef fallið verður frá þessari nýtingakröfu þá situr Icelandair áfram á stærstum hluta allra slotta á háannatíma, þ.e. milli klukkan 7 og 9 á morgnana og 16 og 18 seinnipartinn.
Í því samhengi má rifja upp að forsvarsmenn WOW kvörtuðu árangurslaust á sínum tíma undan skorti á brottfarar- og lendingartímum á morgnana og seinnipartinn. Flugfélagið Delta hætti líka við áætlunarflug hingað sumarið 2015 vegna plássleysis á þessum háannatímum.
Forsvarsmenn Icelandair eru þó ekki þeir einu sem hafa sótt um mun fleiri lendingarleyfi en þeir koma til með nota. Því líkt og Túristi greindi frá nýverið á þá óskaði Play eftir álíka mörgum tímum fyrir næsta sumar og WOW air fékk fyrir sumarið 2019. Þá hafði WOW air ellefu Airbus þotur til ráðstöfunnar en Play er ennþá ekki komið með eina einustu.
