Það verða fyrst og fremst almennir ferðamenn sem fara af stað þegar landamæri opnast og ferðatakmarkanir vegna Covid-19 falla niður. Um þetta virðast sérfræðingar í ferðageiranum almennt vera sammála um. Biðin eftir því að viðskiptaferðalangar fari að kaupa dýru farmiðana sína verður aftur á móti lengri. Megin skýringin á því liggur í samskiptatækninni sem fólk hefur vanið sig við nú í heimsfaraldrinum.
Þessi þróun þyrfti ekki að koma harkalega niður á íslenskri ferðaþjónustu því rétt um þrír af hverjum hundrað ferðamönnum hér á landi árið 2019 sögðust vera í vinnuferð. Það hlutfall er lágt í samanburði við löndin í kringum okkur.
Á sama hátt er vægi viðskiptafarþega hjá Icelandair rétt um fimm prósent. Þessi hópur skilar flugfélaginu líka hlutfallslega mun lægri tekjum en hjá keppinautunum.
Rétt um fimmtungur
Þannig stóðu viðskiptaferðalangar undir um helmingi allra farþegatekna af flugi milli Evrópu og Norður-Ameríku fyrir heimsfaraldurinn samkvæmt tölum IATA, alþjóðasamtaka flugfélaga.
Hjá Icelandair var hlutfallið rétt um fimmtungur líkt og fram kom í fjárfestakynningu Icelandair samsteypunnar í sl. haust. Hjá flugfélaginu hefur áherslan líka ávallt verið á fólk á leið í frí eða að heimsækja fjölskyldu og vini. Og í þotum Icelandair er ekkert fyrsta flokks farrými.
Tugprósenta niðursveifla
Og samdrátturinn sem margir sjá fyrir í fækkun ferðalaga á vegum fyrirtækja og stofnanna er verulegur. Nýverið spáði sérðfræðingahópur Wall Street Journal því að hann myndi nema 19 til 36 prósentum til lengri tíma. Framkvæmdastjóri Star Alliance, samstarfsvettvangs flugfélaga, sér fyrir sér álíka niðursveiflu í viðtali við Financial Times.
Bill Gates, stofnandi Microsoft, telur aftur á móti að vinnuferðunum muni fækka um helming. Forstjóri Delta flugfélagsins sagði Gates þó ekkert geta spáð fyrir um þessa þróun og forstjórar fleiri stórra flugfélaga segjast búast við tíðum vinnuferðum á ný. Þó almennt færri en áður.
Þeir sem borga fyrir fríið með vildarpunktum
Líkt og fram kom hér ofar þá ferðast nær allir til Íslands til að fara í frí en ekki í stutta vinnuferð samkvæmt könnun Ferðamálastofu. Það liggur þó fyrir að margir nota ferðapunkta, sem þeir afla í vinnuferðum, til að niðurgreiða önnur ferðalög.
Þannig getur sá sem flýgur oft vegna vinnu innan Bandaríkjanna með Delta safnað punktum sem duga til að borga fyrir flugmiða með Delta til Íslands. Viðkomandi gistir svo kannski alltaf á Hilton hótelum í vinnuferðunum og getur þá nýtt punktana hjá hótelkeðjunni til að greiða fyrir gistingu á þess háttar hóteli í Reykjavík.
Túristum sem greiða fyrir ferðalög sín með vildarpunktum gæti því fækkað.
