Það er ennþá von til þess að komandi sumar verði skaplegt í ferðaþjónustunni en margir horfa þó frekar til þess að viðspyrnan hefjist í raun í haust. Á þeim tímapunkti verði bólusetningar komnar langt og fólk getur því skipulagt ferðalög með góðum fyrirvara.
Eins og staðan er í dag eru nítján erlend flugfélög með áætlunarflug til Keflavíkurflugvallar á boðstólum í sumar. Öll nema fjögur þeirra gera ráð fyrir Íslandsflugi í haust líka.
Ferðirnar verða þó nokkur færri en haustið 2019 eins og áætlanirnar eru núna. Samdrátturinn í september nemur nítján prósentum og sextán prósentum í október samkvæmt talningum Túrista.
Mest munar þar um fyrirséðan niðurskurð í Íslandsflugi Norwegian og eins hefur easyJet dregið úr. Það munar líka um að ekkert verður af ferðum American Airlines til Keflavíkurflugvallar í ár. Hið þýska Lufthansa ætlar heldur ekki að fljúga sínum þotum eins oft hingað í haust og gert var á sama tíma 2019.
Í heildina þá stefnir í að Wizz Air standi undir um fjórðu hverri ferð erlendra flugfélaga til Íslands í september og október og verði þar með lang umsvifamest í þeim hópi.
Þegar horft er til þeirra félaga sem bæta við ferðum til Íslands frá haustinu 2019 þá munar mestu um nýjar áætlunarferðir Jet2 til Íslands frá nokkrum breskum flugvöllum. Transavia, Czech Airlines og Air Baltic hyggjast einnig bjóða upp á tíðari ferðir en fyrir tveimur árum síðan.
Í ljósi óvissunnar sem ennþá ríkir um framgang bólusetninga og sóttvarnaraðgerðir við landamæri þá má búast við að flugáætlanir eigi eftir að taka breytingum á næstu mánuðum. Túristi heldur áfram að fylgjast náið með þeirri framvindu.
