Flugrekstur Cabo Verde Airlines hefur legið niðri frá því að heimsfaraldurinn hófst í mars í fyrra. Þann tíma hafa staðið yfir viðræður um fjármögnun fyrirtækisins. Fyrir áramót fékk það lán frá stjórnvöldum á eyjunum til að standa skil á launum starfsmanna.
Og nú hefur ríkisstjórn Grænhöfðaeyja veitt fjármálaráðherra landsins heimild til að gefa út ríkisábyrgð fyrir lánum að upphæð sextán milljónum evra til flugfélagsins. Sú upphæð jafngildir nærri tveimur og hálfum milljarði króna.
Kröfuhafar verða líka að koma að borðinu
Til þess að Cabo Verde Airlines fái aðgang að þessum peningum þarf það að ljúka samningum við banka um lánafyrirkomulag og einnig að uppfylla skilyrði ríkistjórnarinnar fyrir ábyrgðinni að sögn Erlends Svavarssonar, forstjóra Cabo Verde Airlines.
„Hluti þeirra skilyrða er að undirritað verði samkomulag milli hluthafa um aðkomu að endurskipulagningu á rekstri félagsins í ljósi breyttra aðstæðna í kjölfar Covid faraldursins. Einnig er skýr krafa um að kröfuhafar félagsins komi til móts við stöðu félagsins með niðurfellingu skulda og lengri greiðslufrestum,“ útskýrir Erlendur.
Íslendingarnir með 51 prósent
Hann ríkislánið ekki vera beinan ríkisstyrk né aukið hlutafé og eignarhlutföll hluthafa breytist því ekki. Í dag á ríkissjóður Grænhöfðaeyja 39 prósent í flugfélaginu. Icelandair samsteypan fer fyrir 36 prósent hlut og íslenskir fjárfestar, þar á meðal Björgólfur Jóhannsson, fyrrum forstjóri Icelandair, eiga fimmtán prósent. Hlutur starfsmanna jafngildir svo tíund.
Sem fyrr segir hefur flugrekstur Cabo Verde Airlines legið niðri nærri allt frá því að heimsfaraldurnn hófst í byrjun síðasta árs. Erlendur segir að framgangur bólusetninga, bæði á eyjunum og í helstu markaðslöndum, muni ráða mestu um hvenær unnt verður að hefja áætlunarflug að nýju.
Markmiðið áfram að tengja saman fjórar heimsálfur
„Starfsfólk félagsins vinnur nú hörðum höndum að undirbúningi og umbótum á flugrekstri og sölustarfsemi fyrirtækisins með það fyrir augum að allt verði til reiðu þegar för farþega verður frjálsari á ný. Þá mun staða Cabo Verde Airlines verða sterk þar sem eyjaklasinn er frábær áfangastaður fyrir sólarþyrsta ferðalanga sem þrá að heimsækja nýjar og framandi slóðir eftir langa einangrun á tímum faraldursins,“ segir Erlendur.
Spurður hvort þessar umbæturnar á flugrekstrinum nái til flugflota og leiðakerfis félagsins þá segir Erlendur að hvort tveggja verði lagað að minni eftirspurn í kjölfar faraldursins. „Markmið félagsins til lengri tíma verður samt áfram að tengja fjórar heimsálfur í tengimiðstöðinni á Sal eyju.“
Líkt og Túristi fjallaði um á sínum tíma þá hafði Cabo Verde Airlines fjölgað áfangastöðum sínum töluvert eftir að Íslendingarnir tóku við stjórnartaumunum. Flugfloti félagsins hefur síðan þá samanstaðið af Boeing 757 þotum sem tilheyra Icelandair samsteypunni.
Þess má geta að Icelandair Group hefur fært niður eignarhlut sinn í Cabo Verde Airlines að fullu.
