Samfélagsmiðlar

Íslensku félögin ekki á leið í samkeppni við Wizz Air á næstunni

Það stefnir ekki í að þotur Icelandair og Play taki stefnuna á Pólland.

Wizz Air hefur verið eitt um flugið til Varsjár eftir að Wow air varð gjaldþrota.

Flugsamgöngur milli Íslands og Póllands hafa aukist hratt síðustu ár og fyrir heimsfaraldurinn nam framboðið um tíu þúsund sætum á mánuði. Sá fjöldi skiptist á milli áætlunarferða til fimm pólskra borga. Í öllum tilfellum er ungverska lággjaldaflugfélagið Wizz Air eitt á markaðnum.

Síðustu mánuði hefur Wizz air aðeins flogið hingað frá Varsjá en nú eru að bætast við ferðir til áfangastaða í vesturhluta Evrópu. Þar á meðal til London, Mílanó og Vínarborgar en fargjöldin þangað eru töluvert lægri en til Póllands.

Eftirspurnin virðist því áfram vera umtalsverð eftir ferðum milli Íslands og Póllands og megin skýringin á því er líklega sá fjöldi Pólverja sem býr hér á landi.

Icelandair hefur hins vegar látið pólska markaðinn alveg vera. Jafnvel þó vísbendingar séu um að þar gæti félagið ekki aðeins náð í fjölda farþega á leið til Íslands heldur líka fólk á leið yfir til Bandaríkjanna og Kanada. Það sést til að mynda á auknum umsvifum pólska flugfélagsins LOT í Ameríkuflugi.

Spurð hvort von sé á stefnubreytingu hjá Icelandair þá segir Ásdís Ýr Pétursdóttir, upplýsingafulltrúi Icelandair, að auðvitað sé alltaf verið að vega og meta ýmis tækifæri.

„Hins vegar er aðaláherslan hjá okkur núna á okkar lykilmarkaði og að koma núverandi leiðakerfi aftur í gang,“ bætir Ásdís við.

Hjá Play eru heldur ekki uppi áform um að fljúga til Póllands fyrst um sinn að sögn Birgi Jónssonar, forstjóra félagsins. En hann sjálfur reynslu af að halda úti áætlunarflugi til Póllands í störfum sínum fyrir Iceland Express og Wow air.

Birgir bendir þó á að verðið sé hátt hjá Wizz Air í fluginu til Póllands þannig að ekki sé útilokað að Play blandi sér í bardagann þegar félagið verður komið lengra af stað.

Nýtt efni

Borgaryfirvöld í Lissabon hafa samþykkt að hækka gistináttagjald úr 2 í 4 evrur. Gjaldtaka nær ekki til tjaldstæða. Þá hefur komugjald á skipafarþega verið hækkað úr 1 í 2 evrur. Tillaga um að hækka það gjald í 4 evrur var felld.  Lusa-fréttastofan hefur eftir Carlos Moedas, borgarstjóra, að það sé „sanngjarnt fyrir borgina og íbúa …

MYND: ÓJ

Kínverskir ferðamenn hafa verið töluvert áberandi í Reykjavík og víðar um land í vor. Auðvitað er fólk af kínverskum uppruna búsett um allan heim og eitthvað af því fer í Íslandsferðir en þeim hefur snarfjölgað sem koma hingað alla leið frá Alþýðulýðveldinu Kína. Samkvæmt talningu Ferðamálastofu á Keflavíkurflugvelli komu hingað í marsmánuði 8.642 Kínverjar og …

Brasilíski flugframleiðandinn Embraer greinir frá góðum gangi í pöntunum og afhendingu véla á fyrstu mánuðum ársins. Mestur var fögnuðurinn í höfuðstöðvunum í São José dos Campos þegar American Airlines staðfesti kaup á 90 farþegaþotum af gerðinni E175, sem verða notaðar í innanlandsflugi og eru hluti af stórri endurnýjun flugflota félagsins. E175 eru meðaldrægar vélar, oftast …

Faxaflóahafnir héldu vorfund sinn fyrir helgi til að kynna fyrirtækjum í ferðaþjónustu skipulag sumarsins við móttöku skemmtiferðaskipa, sem tekur mið af því raski sem verður vegna byggingar farþegamiðstöðvar Faxaflóahafna. Þeim framkvæmdum á að ljúka að tveimur árum liðnum, eins og FF7 greindi nýverið frá. Fram kom á fundinum að gert er ráð fyrir rúmlega 308 …

Fréttaveitan Bloomberg sagði frá því á dögunum að mikil úlfúð ríkti í alþjóðlegu kolefnisvottunarsamtökunum Science Based Targets initiatives, eða SBTi.  Fyrirtæki um allar koppagrundir hafa lengi reitt sig á vottanir frá SBTi þegar þau hafa fullyrt að þau stefni að kolefnishlutleysi.  Yfirleitt er kannski lítil ástæða til þess að fólk kippi sér upp við slæman starfsanda og …

Þegar lent er á flugvelli á ESB-svæðinu bíður farþeganna ekki verslun með tollfrjálsan varning við töskubeltin. Þess háttar er aðeins í boði fyrir brottför. Í Evrópuríkjum utan ESB gefst hins vegar tækifæri til að kaupa ódýrara áfengi við komuna eins og við þekkjum frá Keflavíkurflugvelli. Þeir sem nýta tollinn sinn þar til að kaupa léttvín …

Þrjár þotur Loftleiða munu næstu misseri fljúga viðskiptavinum erlendra ferðaskrifstofa hringinn í kringum heiminn. Um borð eru sætin stærri og færri en í hefðbundnu áætlunarflugi enda kostar ferðalagið skildinginn. Hver farþegi borgar 25 milljónir fyrir ferðalag líkt og farið var yfir í fréttum Stöðvar 2.  Það er ekkert nýtt að Icelandair leigi þotu og áhöfn í …