Um fjórði hver ferðamaður hér á landi yfir vetrarmánuðina er breskur. Þannig var þetta alla vega fyrir heimsfaraldur því þá komu hingað fleiri Bretar í febrúar en samanlagt yfir sumarmánuðina þrjá.
Breski ferðarisinn Thomson/TUI hefur verið stórtækur í vetrarferðum til Íslands og flogið hingað allt að fimmtán þúsund farþegum á þessum tíma árs. Það er Snæland Grímsson sem hefur skipulagt Íslandsdvöl farþega bresku ferðaskrifstofunnar og að sögn Hallgríms Lárussonar, framkvæmdastjóra fyrirtækisins, þá var útlitið í byrjun vetrar ágætt.
„Við höldum alltaf að við séum að komast fyrir horn og þannig var stemningin í lok nóvember í fyrra. Þá var bókunarstaðan fyrir hátíðarnar góð og almennt reiknað með að áramótin yrðu í takt við eðlilegra árferði. Þegar ómíkrón fárið skall á í byrjun desember þá streymdu inn afbókanir. Meirihluti farþeganna skilaði sér því ekki og við eins og önnur ferðaþjónustufyrirtæki sátum upp með kostnað og mannskap,” segir Hallgrímur.
Hann vonast engu síður til þess að úr rætist og Bretarnir skili sér í febrúar. Margir þeirra sem áttu bóka far hingað í lok síðasta árs hafi til að mynda seinkað Íslandsdvölinni fram í næsta mánuð en þá eru norðurljósaferðir eitt helsta aðdráttaraflið.
Hallgrímur segir þó ljóst vera að óvissan um framhaldið sé mikil þó Ísland sé vissulega vinsæll áfangastaður.
„Hvort það skili okkur fjölda ferðamanna á næstunni ræðst algjörlega á því hver staðan verður á faraldrinum hér á landi og í heiminum öllum. Þar er ekkert í hendi ennþá nema gamla góða bjartsýnin.”
Spurður hvort ferðaþjónustan hafi úthald mikið lengur þá segir Hallgrímur að greinin hafi í raun verið sett á guð og gaddinn.
„Það eru engin úrræði lengur í boði fyrir ferðaþjónustuna hjá stjórnvöldum því viðspyrnustyrkir voru síðast veittir í nóvember. Þess vegna fór það illa í marga þegar veitingamönnum var boðið upp á sérstök úrræði í síðustu viku en horft framhjá okkur í ferðaþjónustunni.”
